Mahni zâwn ṭheuhah inrenchem ila

Mizoram sorkar chuan West Asia (Middle East) buaina kal zel avangin leihriak (tuialhthei leh gas)-te renchem tur te, mahni lirthei hmang tam lo a, public transport lirtheite hmang uar tur te, lirthei inhman ṭâwm uar tur te, ṭul loa zin chhuah pumpelh turtein mipui a ngen.

Sorkarin Mizoram mipui an ngen hma hian sorkar inrenchem nan - sum sen tihtlem nan leh tuialhthei hman a tlem zawk theih nan hmalak a lo ni tawh. Sorkar lirthei ken chhuah loh ni (Nilaini) siam, pisa kai zat tihtlem a, in lam aṭanga thawh theihte thawh, pisa inkai chhâwk, kawlphetha renchem, loh theih lohah lo chuan zin chhuah loh, tihte chu a langsar zual a ni.

Asia khawtlang lamah hun eng emaw ti chhung buaina a awm tawh a, a la awm mek. He buaina hi khawvel ram hrang hrangin an tuar a, India ram pawhin nasa takin an tuar mek. India ramin a tawrh chuan thawh chhuah nei tlem leh sorkar laipuia innghat nasa tak Mizoram pawhin a tuar lo thei lo.

Mizoram state a nih hnuah tun ṭuma sorkar inrenchemna tura ruahman hi Mizoram sorkarin inrenchemna a kalpui nat ber ṭum a ni hial mai thei a; kaihhnawih leh nghawng tam tak a nei ngeiin a rinawm.

Sorkar, khawtlang, kohhran, chhungkua leh mimal angin inrenchem hi a ṭha hrim hrim a, kan tih ṭheuh atana ṭha a ni. Tuna sorkarin inrenchem a kalpui leh mipui pawh inren tura a ngen ang hian, mi tinte kan theihna zâwn ṭheuhah inren thiam ila a duhawm hle.

Tun dinhmunah Mizoram mipuiin leihriak lamah harsatna tâwk rih lo mah ila, ren viau erawh a ngai tih a chiang. Chuvangin, chhungkaw tinin, mi tinin kan ren thiam a ṭul a; mahni veng chhunga pawipang ti tur leh inkhawm tura lirthei ken chhuahte hi loh theih lohah lo chuan ti rih lo ila a duhawm.

Sorkarin inrenchem a kalpui a, nasa taka a inhrêk a nih lai hian, ṭul lem lo thlenga inhrêk lutuk erawh a awm ve theiin a rinawm. Sorkar hna kal laiin a tawrh loh nan leh mipuiin harsatna an tawh phahna loh nan fimkhur leh invên a ṭul ang.