Zanah lirthei tlân endik zel ni se

Aizawl Traffic Police chuan May 23, 2026 zan khan zankhuain Aizawla hmun hrang hrangah lirthei tlân vel an endik a, dan bawhchhia mi 74 an man.

Traffic police-te'n dan bawhchhia mante chu - bike ri ring hmang 12, license nei loa lirthei khalh mi 12, chak lutuk/hlauhawm taka khalh mi pathum, rûi chunga khalh mi pali, helmet khum lo leh dan loa khalh dang mi 43 an ni.

Special Drive hi dan bawhchhiatna hrang hrang vanga khawpui chhunga chetsualna thleng ṭhin titlemna atan leh mipui himna tura tih a ni. Hetianga traffic police-te'n hma an la hi a lawmawm tak zet a, mipui pawhin ṭha an tiin an thláwp hle tih a lang. Drive avangin traffic police-te fakna thu pawh hmuh tur a tam hle.

Zan lama Special Drive neih chu a ṭul anga an kalpui zel dawn thu Aizawl Traffic Police Media Cell-in an tarlang. Zan lamah dan loa lirthei khalh a tam zual a; chuvangin, zan lama lirthei tlân vel endik hi englai pawha ṭul a ni. Traffic Police-in 'A ṭul angin' an tih angin, a ṭul avangin han chhunzawm zel ngei se a duhawm.

Zankhaw tairêk thlenga lirthei tlân vel endik hi a hautakin a hahthlak hle ang tih a hriat a, traffic police awm zat ngaihtuahin, an indaih lo viau pawhin a rinawm. Zan tin tih chu a harsa ngei dawn a; chawlhkar tin zan khat tal, tih hun tur sawi lâwk loin ti thei se, zan lama dan loa lirthei khalh an tlem phah ngeiin a rinawm.

Khawpuia lirthei khalhtu tam tak chuan traffic police duty an awm loh avangin dan lo leh traffic rules ang loa lirthei khalh a theih ta emaw an tih ṭhin niin a hriat. Traffic police an awm loh avangin dan bawhchhiat a thiang ta tihna a ni lo a, dan zawm a ṭul hun lai tak zawk a ni.

Lirthei kaihhnawih dante leh traffic rules-te hi bawhchhiat tura siam ni loin, zawm tura siam a ni. Ṭha taka dan zawm hi lirthei khalhtu te, lirtheia chuangte leh kawnga kalte himna atan a pawimawh em em. Mi tinin dan kan zawm a ṭul a, dan zawm hi mi tin himna leh ralmuanna tur a ni tih kan hriat tlân a ṭul.