Sorkarin thawktu ṭha, inpe zo a duh

Vigilance Department-in May 26, 2026 khan ATI Auditorium-ah 'Workshop for disciplinary authority' an buatsaih. An hun hmanpuitu Chief Minister chuan, sorkarin thawktu ṭha, hun vawng dik, inpe zo neih a duh thu a sawi.

CM hian sorkar hnathawkte'n hun an vawn dik a, an hna ṭha taka an thawh theih nan hma an lak nghal thu te, sorkar hnathawk zinga chhawr tlak lohte dap chhuaktu tur Service Review Committee din vek tura an tih thu te, chhawr zui tlak lohte an chawlh theih nan special pension an siam thute a sawi bawk.

Sorkar hnathawk zingah ṭha leh fel tak tak, taima em em, rinawm tak leh ṭhahnemngai taka thawk ṭhin, loh theih loh tih lohah chuan pisa tlai ngai lo leh bàn hun hmaa báng ngai lo mi ṭhahnem tak an awm; chung mite chu an fakawm em em a, sorkar mai ni loin, ram leh hnam mawina an ni.

Sorkar inrêlbâwlna ṭha a awm theihna tura huaisen taka sorkar hmalakna a lawmawm em em a; sorkar thuchhuak zâwmtu sorkar hnathawkte an fakawm hle.

Chutihrualin, taima lo leh zawmthaw, hnaa rinawm lo eng emaw zat an awm ve bawk a; sorkarin pisa kai hun a tih zâwm ṭha duh lo pawh tam tak an awm. Tun hma kum 2/3 kal ta ngaihtuah chuan sorkar hnathawkte'n hun an vawng dik tawh zawk tlangpui a; pisa ṭan huna thleng hman lo eng emaw zat an la awm bawk.

Sorkarin thawktu ṭha, hun vawng dik, inpe zo neih a duh thu CM-in a sawi hi sorkar hnathawkte'n an hriat reng a ṭul. Thawktu ṭha leh ṭhahnemngai, rinawm, a hun taka thlenga bâng ṭhin ni vek se ramin hma a sawn phah ngawt ang. Sorkar hnathawkte hi sorkarin a rawihte an ni a; min ruaitu duh dana awm leh an thu awih hi mi rinawm, thawktu ṭha nihna a ni tih hriat reng a pawimawh.

Sorkar hnathawkte duhkhawp lohna sawi a ni fo a, a dikna chin a awm a; chutihrualin, sorkar hnathawk zawng zawng sawina erawh a ni lo tlangpui. Duhkhawp lohna sawi hian sorkar hnathawk zawng zawng tihna ni loin, thatchhia leh zawmthaw te, pisa kai hun bawhpelh ṭhinte sawina a ni ṭhin tih hriat a ṭha. Sawiselnate hi inenfiahna atan hman ṭheuh thei se a duhawm.