Sorkar hnaa duhsak zawng lâk
Mizoram Pradesh Congress Committee (MPCC) chuan thuchhuah siamin, School Education minister chuan SSA leh RMSA hnuaiah advertisement chhuah loa thawktu mi 91 lâk a nih a pawm niin an sawi a; he hna lakah hian a duhsak zawng a la ngei niin an puh bawk.
MPCC chuan, "October 28, 2019-a MZP-in Zirlaite Ni an hmannaah minister Lalchhandama Ralte-in, 'Education Minister-in a duhsak zawng a la lo... SPD hnenah ka ziahsak mai a ni, ka laktir tumah an awm lo' tia a sawite chu zirlaite hmaa dâwt sawina a nih thu an tarlang a. School Education Minister-in, 'Ani hi special-a kan ngaih pawimawh a ni a, ...Physical & Health Instructor-ah lak ni se. Lungpher khuaah attached dan lo dappui ta che,' tih te, 'Ani hi ka duhsak tak a ni a, RMSA High School remchangah zirtirtu atan lak a ṭha hle mai,' tih te, 'Hei hi lo appoint ta che, special case a ni e,' tihtein a duhsak zawngte dilnaah a ziahsak tiin an sawi a, a document a awm thlap niin an sawi bawk.
Tunlaia Mizoram politics-a thu langsar tak mai chu School Education derpartment hnuaia hna lak chungchang a ni. Hna lak dan kalphung pangngai zawm chiah loin, MPSC kal tlang loin muster roll zirtirtu 881 lak a ni a, lâk a nih hma aṭangin sawi a hlawh. Hna lâkna result a lo chhuak a, MNF party ngeiah pawh lungawi lohna thawm a ri ring hle niin an sawi. Hei hian hna lak hi a fair thawkhat niin a lantir thei a; chutih ruala sorkar hna laka ruling lam lungawi lo an awm ṭhin hian sorkar hna lak hi ruling lam chana ngaihna a lian hle tih a lantir.
Mipuiin zirtirtu 881 lak an khel luai luai laiin School Education department hnuaiah tho mipui nawlpui hriat loh, ruling party mi leh sa tam zawkte pawhin an hriat lohin mi 91 zette chu hna thar an lo pe fel diam a, he thilah hian induhsakna uchuak tak a tel ngei niin a lang. Kan ram hruaitute'n an duhsak zawng hna an dilpuina hi lehkhaah ziakin a lang ngei a, hetiang hi kum li lo awm leh turah hian thleng nawn tawh lo hram se a ṭha hle.
'Iptepui banna' an nih vangte leh duhsak bik an nih avanga hnaa lâk an nih hnua an attach-na tur post thlenga dilsak an awm hian Mizo ṭhalai thiamna hmanga hna zawng mekte a tihnualin a tilungawi lo palh ang tih a hlauhawm takzet a ni.