Sorkar sikul tharte ṭang sauh rawh se
May 18, 2026-a Council of Ministers chuan Mizorama sikul 51 chu sorkar sikul ni turin a pawm a; chumi chungchang chu School Education Minister-in press mite hmaah a sawifiah.
Minister sawi danin, The Mizoram Education (Lumpsum Grant-in-Aid for General Maintenance of Private School), Rules, 2025 tlawhchhanin sorkar sikul ni turte chu thlan a ni a; Rules-ah hian sorkar sikul ni tura tehfung a awm. Sikul 51 sorkarin a lak belh dawn avang hian sorkarin kum khata cheng vbc 10 vel a sen belh dawn.
Hun kal tawhah Mizorama sikulte hi sorkara thuneitute'n politics khelh nan an hmang ṭhina ngaih theih a ni a; a chhan chu - inthlan dawn hnaiah sikul tam tak dinhmun sang zawka dah an nih ṭhin vang a ni.
Khua leh veng tam takah mamawhna avangin khawtlangin sikul an din ṭhin. Khawtlangin sikul an dinte chu tun hma aṭang tawhin sorkarin a lo la tawh ṭhin a, chu chu tun thlenga kal dan a ni. Khawtlangin a din sikulte chuan sorkara luh an nawr leh tlangpui.
Kan sikulte sorkarin la se kan tih em em ṭhin chhan hi - sikulin hma sawn se, zirna ṭha zawk kan nei thei ang tih vang nge, zirtirtute hlawh ṭha zawk nei tura kan duh vang, tih hi ngaihtuah tham tak a ni.
Khawtlang din sikulte sorkarin sorkar sikul ni tura a lak emaw, dinhmun sanga a dah dawn emaw a nih chuan ti mai mai loin, tehfung ṭha tak a awm tur a ni. Tuna sorkarin tehfung (dan/rules) a hman hi sikul/khaw ṭhenkhat tan chuan a ṭha tâwk lo thei a; chutihrualin, sikul zawng zawng tana lawmna tur rules siam erawh a harsain a rinawm.
Cabinet thutlukna hi dodalnate pawh a la awm mai thei. Dodalna awm mah se, dan tlawhchhan mumal tak leh uluk taka tih a nih chuan, sorkar hi huaisen takin a thutluknaah a ding tlang tur a ni. Tihsual palh a awm a nih erawh chuan, siamṭhat hreh loh a ṭha.
Sorkarin a lak thar tur sikulte an lawmpuiawm. Chutihrualin, sorkar sikul an nih hnuah zirna a chhe sawt ang tih erawh a hlauhawm. Sorkar sikul tharte avangin sorkarin sum tam tak a sèn belh dawn a, zirnaah tlahniam loin, an ṭha sawt zawk tur a ni a; zirna a ṭhat lehzual theih nan thawktute an ṭang zual sauh tur a ni.