Krismas chawlh

Vawiin, December 23 hi kum 2016 chhunga Vanglaini chhuah hnuhnung ber tur a ni a, ruahman lawk ang chuan kum thar, January 4, 2017-ah tihchhuah leh a ni ang.

Krismas leh kumthar vuak-veta chanchinbu chawlh nei rei hian sawisel a hlawh viau ṭhin. Chanchinbu chhiartute'n chawlh an hmang a, an hunawlah chhiar tur an duh
ṭhin a; he hunah hian chanchinbu ber an lo chawl ṭhin si a, a hrilhhaithlak hle ang. Mizorama nitin chanchinbute hian Krismas chawlh hi an hmang rei ṭhin hle a, tun hunpui lo thleng turah pawh hian hun rei tak chhung chu nitin chanchinbu chhiar tur a awm dawn lo niin a lang.

Krismas vuakvetah hian chawlh hi kan hmang rei tlang hle a, sorkar ber pawhin chawlh a hmang rei hle. Holiday pangngai piah lamah hian sorkar pisa tam zawk hi chuan hunpuiah hian hna an thawk ngai mang lo a, Krismas leh Kumthar inkarah hi chuan pisa tam ber hi a chawl deuh ṭhuap a, a kal chhunte pawhin hna an thawk tam vak ṭhin lo.

Kristian hunpui a ni a, kohhran hi chu a hmang uar ber tur an ni bawka chawlh an nei rei hle. Mizorama office hrang hranga chawlh ngah ber chu kohhran office-te hi an hial mai thei? Political party-te hlei hlei hian Krismas chawlh hi an hmang uar a, hun rei tak chhung chu an office hi an khar tawp mai a; tlawmngai pawl dangte pawhin uar takin hun rei tak chhung Krismas chawlh hi an hmang ṭhin.

Hunpuia chawlh lak hi hnam dangte pawhin an uar viau tho a, Vai kan tihte hian an puja leh a chhehvelah hun tei tak chawlh an hmang ve ṭhin bawk.

Hnam tin hian mahni puala hun bik hi kan nei a, Mizote tan hi chuan Kristian kan nih hnua kan hunpui Krismas leh kumthar hi kan lawm uar ta ber a, kan kût neihte aiin kan lawm uar zawk a, kan hlimpui zawk bawk a; kan han chawl rei ve deuhte hi chu a hriatthiam theih dan pawh a awm e. Amaherawhchu mipui rawngbawltu chanchinbute lehzel rei tak an chawl hian sawisel a hlawh lo thei lo a, a phur darhtu lirthei awm lo leh a semtu lam chawlh lakte hi mipui tan chuan chhuanlam tling tak a ni thei lo.

Kan kalphung hi zawi zawiin a inthlak hret hret a, Krismas leh Kumthar inkara chawl rei lo deuha kal hunte pawh a la awm chho ve ngei ang.

Vanglaini chanchinbu chhiartu zawng zawngte Krismas lehKumthar chibai kan buk a che u.