Hostel

Mizoram sorkar chuan Mizoram chhunga zirlaite tana hostel siam zawng zawngte chu, December 2016 ral hmaa an hostel awm dan leh enkawl dan kimchang School Education department-a thehlut vek turin a hriattir.

Mizoram sorkar hian hostel enkawl danah dan leh hrai a siam thar a, March 29, 2016 khan gazzette-ah a chhuah. He Rules hian mi 10 chin awmna zirna-in bakah private hostel leh home hrang hrangte a huam vek a, dan zâwm lote chu an permit tihtawpsak theih an ni.

Mizorama hostel tam tak hi chu mahni fate awmna tlak tur khawpa ṭha ni bawk mah se, hostel ṭhenkhat erawh hi chu inenkawlna a chhiat bakah a ṭawp takzet a ni. Hostel hi khawpuiah bak chuan a awm lo tluk a ni a, a bikin Aizawl hi hostel tamna ber a ni a, a kal-phung hi ngaihtuah a ngai hle.

Heng hostel ṭhenkhat hi chu sumdawnna liau liau a ni a, inenkawlna a chhiat avang leh ei leh in, a hmunhma, a room leh a bungrua thlenga a chhiat avangin awmna atan a iaiawm hle. Hetihlai hian thingtlang aṭanga zirna leh hnathawhna avanga khawpuia awm tan erawh chen loh theih loh a ni a, mahnia in luaha inbawl hrang turin sum a hek bawk si a, hostel hi an bel lo thei ṭhin lo.

Engpawhnise tun anga a duh apiangin an duhna hmun apianga an duh dana hostel an din tawp mai hi chu a fel lo. Miin hostel a siam a, awm man chawia mi a dah a nih chuan an chungah mawh-phurhna a nei tih inhria se, an sahimna (security) thlengin an kutah a awm tih an inpawm a ṭha.

Sorkarin hostel siam dana khaihhruaina mumal tak a siam hi a lawmawm a, hei hi ṭha takin kal tlangpui se, dan siama kenkawh leh si loh hi chu dan siam loh nen a danglam lo a, hostel inkaihhruaina dan hmang hian kan hostel neihte hian hma sawn ngei rawh se.