Mizoram State Lottery

Mizoram sorkar chuan The Mizoram State Lottery aṭanga kum thum chhung, 2012-2013 aṭanga 2014-2015 inkara an sum hmuh tur cheng vbc. 11,834.22
aṭangin cheng vbc. 25.45 chiah an la hmu a, sum hmuh loh zat chu vbc. 11,808.77 a ni. Mizoram sorkarin lottery aṭanga sum a hmuh tur ang a hmuh loh chhan bulpui ber chu Lotteries (Regulation) Rules 2010 leh Union Home Ministry thupek a zawm loh vang niin a lang.

Mizoram State Lottery kalpui dan hi mipui nawlpui chuan kan hrethiam lo a, hriatthiam theih pawh a ni hek lo. Mizoram sorkar sum hmuhna ṭha tak a ni a, sum lakluhna mumal nei
ṭha lo Mizoram tan hun rei tak chhung chu sum lakluhna ṭha tak a ni reng tawh. Hetihlai hian a khat tawkin Mizoram State Lottery kalpui danah hian sawi neuh neuh a awm leh ṭhin a, a kalphung dik tak hi sawi fiah a ṭha khawp mai.

Tun hnaia Comptroller and Auditor General (CAG) of India buatsaih Performance Audit of Mizoram State Lotteries-a thil lang hi eng nge a nih chiah mipui tan hriat theih a ni lo a; hetia a lan dan mai chuan Mizoram sorkar hian cheng vaibelchhe tam tak a hloh ngei niin a lang. Hei hi thil dik tak a nih ngai chuan, sum indaih loh vanga harsatna tawk mek Mizoram sorkar hian thil a kalpui fel loh vangin a sum hmuh theih tur tam tak a hloh tihna a ni dawn a, a pawi hle a ni.

Mipui nawlpui chu sawi loh, sorkar mi pawimawh chin-ah pawh hian Mizo-ram State Lotte-ry kalphung hre fiah thiam lo hi eng emaw zat an awm dawn. Tuna pawisa hloh zat nia langte pawh hi eng chiah nge a nih a, eng anga kalpui zel chi nge, tihte pawh mipui hian an hre duh ang. Lottery sum che vel leh Mizoram sorkar dinhmun dik tak hi mipui hriatah puanzar ni se, mipui hnena thil awm dan dik tak hrilh hi sorkar hian a ba a ni.