Fai ber nih i tum ang

India ram khawpui fai thlanna tur survey, Swachh Survekshan 2017 atan inpuahchahna, Swachh Aizawl City Plan-2017 chu tun hnai khan UDPA minister-in a hawng a; Aizawl khawpui chu inthiarna mumal nei lo awm lohna, 'Open Defecation Free (ODF)' ah leh bawlhhlawh a paihna hmunah chauh paihna 'Litte-ring Free Aizawl' a puang nghal.

Sorkar laipuiin faina kawngah ṭan a la nasa a, hei hi Mizoramah pawh a thawm kan hre ṭan ta. Mizoram sorkar a ṭang a, faina kawnga inzirtirna ṭha tak tak a kalpui mek a, hemi piah lamah hian faina kawngah a takin ke a pen ṭan mek ta bawk.

Heti khawpa hun ṭha inher chhuak chunga Mizoramin faina kawnga hma kan sawn tak tak lo a nih chuan keimahni thiam loh a ni ang. Faina lamah sum dah a ni a, programme ṭha tak tak duan a ni a, hei hi Mizoram sorkar hian thapui thawhin lo bawhzui se, India rama fai ber nih hi thil harsa tak niin a lang lo.

Mipui nuai 11 vel chenna state kan nih hi hman ṭangkai theih a ni a, kan tlem avangin tibawlhhlawhtu hi an tlem a ni. Kan ram hi tlang ram a ni a, phai ram angin bawlhhlawh paih pawh a harsa lo a, khaw fai tak neih hi inzirtirna a ṭhat phawt chuan thil harsa a ni lo.

Sorkar laipui
aṭanga ruhmanna a awm hma pawhin khaw tam tak chuan lawmman leh ṭan-puina beisei loin fai ṭhatzia hriain faina beihpui an lo thlek tawh a, an hlawhtling hle. Tunah sorkar laipui leh state sorkar-in faina kawngah beihpui a thlak leh dawn a, hei hi an hlawhtlinpui ngei tur a ni.

Rûn dâl leka thil kalpui theih a nihlaiin tih takzeta kalpui a nih chuan a ram pum hmel tidanglam thei a ni a, chuvangin he hun ṭha hi i bawh pelh lo ang. Sorkar laipuiin faina kawnga beihpui a thlak hi Mizoram hian a ṭangkai thei ang berin lo hmang ila, India rama state fai ber leh khawpui nei fai ber nih i tum teh ang u.