Aizawla tui sem

Public Health Engineering (PHE) Secretary chuan Aizawla tui sem tur pump chhuah tur a tam tawk thu a sawi a, chutih rualin a sem chhuah lamah harsatna hrang hrang a awm ṭhu a sawi a; tui hmuh ṭhat beisei vanga tui semtute therhlo hmanga tihlungawi tum an awm ṭhin chuan harsatna a thlen thu a sawi. 

Aizawl khawpuia mihring kan pun chak dan en hian a tira tui laknain a chawm zawh zat tura rin aia tam daih an awm tawh a, tui indaih lohna hi chu a awm ngei tur a ni. Hei vang hian mipui lam pawhin kan tih theih tawk lo tih a, mahni inah ṭheuh ruahtui khawlna siam kan uar deuh deuh a ṭha khawp ang.

Hmun ṭhenkhatah tui indaihlohna a nasat viau laiin tuten emaw tui semtute thilpek pea lo tilungawi a tui dawn tam bîk an tum ṭhin a, chu chuan harsatna a thlen. Hemi kawngah hian tui semtu sorkar mi rawihte an demawm a, hei hi hmun danga sorkar hna­thawkte eirukna tluk tho a ni. Chutih rualin mahni chan tur pangngai aia tam tui dawn duh avanga tui semtu lo 'thamtute' pawh hian an tidik lo hle a ni. 

Khaw nuam leh nuam lo chu tui a ṭhat leh ṭhat lohah a innghat ṭhui hle a, kan khawpui ber kiang lawkah tui pump chhuah tur a awm chunga tui duh khawp kan hmu hleithei lo hi a veiawm hle. Tui semna tur project hi a hautakin a lian tham hle a, awlsam taka hmuh theih a ni lo ang tih chiang mah se, sorkarin ngaih pawimawhah a neiha a nawr tak tak chuan tihhlawhtlin theih chu a ni ngei ang. 

Aizawl khawpuia mipui ṭhahnem takte hnena rual khai taka tui sem hi a awlai hauh lo ang; nimahsela hnathawktute'n inpekna thar nen theihtawp chhuah se, mipui rawngbawlna a ni tih hre chungin ṭan la zel rawh se.