December 25

December 25 hi Krismas a ni a, he ni hi India sorkar mi pawimawh tak ni ṭhin Atal Behari Vajpayee piancham a ni bawk. BJP kaihhruai sorkar laipui chuan prime minister hlui leh BJP hruaitu hlun Vajpayee piancham denchhenin December 25 hi Good Governance Day-ah a puang. Hei hi Mizorama tlawmngai pawl hrang hrangte chuan an duh loh thu an puang a ni.

December 25 hi kristian-te hun bik a ni mai lo a, Mizote tan chuan kum khata kan ni nghahhlelh ber a ni awm e. Mizote hian hnam angin kût hi kan lawm tawh meuh lo a, Chapchar Kut kan tihte pawh hmun khata kal khawma lawm mai
ṭhin kan ni tawh a, mipui nawlpui nghawnga kan lawm awm chhun chu Krismas hi a ni. He niin kan nuna hmun a luah thukzia ngaihtuah hian, December 25-a Mizorama thil dang tih tum hi chu a tina tin chhin chi pawh a ni lo.

Sorkar laipui hi chuan Mizoram leh kristian tamna state-te hi a ngaihtuah ber a ni dawn lo a, prime minister hlui Vajpayee hi a dah pawimawh hle tih a lang. He thil hi Kristianna nek chep tumna ngawr ngawr zawnga thlir duh tan chuan a puh luih theih ang a, Hindu lam âwn deuh political party thil tih a nih miau avangin an dem pawh hi a awm tho. Chutihlaiin anni lam chuan sakhaw thil lam aia BJP hruaitu hlui Vajpayee piancham a nih vang chauha he ni hi rawt an nih thu an ṭan chhan ve thun ang.

December 25 khera Good Gover-nance Day hman tum hi Mizoramah chuan a hlawhtling dawn lo tih a chiang sa a, hei hi sakhua leh khawtlang tana pawi khawihna tluk deuhthaw thil a nih vangin Mizoramah chuan hmang lui tura innawr loh mai hi a ṭha ang. December 25-a Good Governance Day hman duh loh thu hi thuneitu lamah a tam thei ang ber thlen ila, kan duh loh na na na chu barh luih vanga hman luihtir theih kan ni lo ang.