Thing phunte enkawl zui a ṭul

Kum 2026-a Green Mizoram Day (June 11) chu district khawpui tin bakah, khua leh hmun dang ṭhenkhata hman a ni leh ta. Thing leh mau leh nungcha te humhalh a ṭulzia infuihna thu ṭha tak tak sawi a nih bakah, thing ṭhahnem tak phun belh leh a ni a; kângmei vênnaa thawk ṭhate hnenah lawmman hlan a ni bawk.

Green Mizoram Day (GMD) puala thil tih ṭhinteah hian a hlawhtlinna hmuh nghal zung zung theih a ni lo a, beisei chi pawh a ni lo. GMD hman a ni te, a puala thil tihte hi a hlu em em a; hmalakna leh thil tih zawng zawng hian zawi zawiin ram leh hnam tan hmasawnna a thlen ngei a rinawm.

Kum eng emaw zat GMD hman a ni tawh a, kum 2025 thlengin GMD pualin thing phun tur 29,74,318 sem tawh niin, thing 17,79,503 phun a nih tawh thu kumina GMD hmannaah tarlan a ni.

Mizorama thing ṭiak sem tawh leh phun tawh zat hi a tam tham viau. Thing phun tawhte hi puitling vek se chuan kawngpui kam hmun tam zawkah thing a ding thelh sung tawhin a rinawm; mahse, chutiang chu a la ni lo.

Thing nuai tél phun tawh zingah hian a tam ber chu a puitling lo a ni tih a hriat theih. Thing phun a puitlin loh chhan a awm nual ang a, enkawl zui loh vanga puitling ta lo a tam berin a rinawm. Thing nuai tél phunnaah hian sorkar sum sên a tam hle tawhin a rinawm a, sum sên leh thing phun hlawhtlin dan a inhen lo viau pawhin a ngaih theih àwm e.

Hun kal zel turah chuan GMD-a langsar taka thing phun te, vawi khat hungah leh media-a lanah hian duhtâwk lo ila; thing phuntute'n kan thing phun ṭheuh a puitling theih nan ngaihvenin enkawl zui ṭhin ila, awmzia a nei ngei ang.

Thing phun belh zel a pawimawh reng a, a tam thei ang ber phun zel a ṭha. Thing phunte ṭha zawka enkawl a nih theih nan tih dan thar ṭha zawk tur an ngaihtuah chhuah a ngai. Sorkar, a bikin EFCC department mawh a nih rualin, pawl leh mipui pawhin mawhphurhna kan nei a ni tih kan hriat tlan a ṭul e.