CM thil thlir dan hi a lawmawm

Chief minister Zoramthanga chuan a kaihhruai sorkar chu mi dang dem hman an nih loh thu sawiin, "Hna kan thawk char char dawn," a ti a, “A chhe lai siam ṭhat char char a ngai a, kan hmasawnna hnathawh tur hi mi tin tan a ni a, political party dang pawh a huam ang. Pumpui tlang chhah leh a ríl phiar fatute'n an ei pawhin fatute chu kan thîk ngai lo a, kan duh ber ṭhin chu ruaiṭheh a ni," a ti a; Congress sorkar thil ṭha tihte an chhunzawm tur thu a sawi. 

MNF kaihhruai sorkar a lo pian hnu hian thil chhin­chhiahtlak tam tak an ‘sawi’ ta a, an umzui zel thei a nih chuan kan ramin a ṭhatpui ngei ang tih a rin theih. Chief minister hian tun hmaa ro an rel hmasak khan ‘inchibaina atan kum nga kha a ral a,’ ti ang deuhin a lo sawi tawh a, tunah chuan hnathawh ṭan nghal a nih tur thu huaisen takin a sawi. 

Chief minister hian hnathawh a tum tak tak a ni tih a lang a, a thawh tum dan leh a party leh a hnuaia sorkar hnathawkten an thawh dan erawh a vil zui a ngai ang. Eirukna leh hlemhletna kan tihte hi miin hna an thawhna aṭanga lo chhuak a ni duh khawp a, hotu lamin hnathawh an tumna remchanga laa eiruk tur lo dap ngar ngar pawlte hi an awm ṭhin a, a pawi hle a ni. 

Kan chief minister hian sorkar hmasa thil tih ṭhat a awm chuan chhunzawm a tum thu a sawi hi thil lawmawm tak, Mizorama kan hriat zen zen loh a ni. Chutihlaiin sorkarna an siam hma hauha NEDP hnuaia hna kal lai titawp tur leh work order pek tawh hna la ṭan lote chu hnathawk lo tura tihna a lo chhuak mai kha a vanduaithlak a, kha thil ‘verbal-a thu petu’ kha chief minister thusawi nen hian a chet dan a inkalh tlat a ni. 

Kan ram hotupa berin hna­thawh ṭan a tum a, sorkar hmasa dem a tum lo a, an hnathawh ṭha chhunzawm zel a tum bawk a, he­tianga ruahmanna nei CM kan nei hi a lawmawm a, a thusawi hi a tak a chan ngei theihna turin a thawhpuite, party leh sorkar hnathawkte’n ṭha takin ṭawiawm rawh se.