Mizo ram leh hnam tan YMA

Vawiin June 15 hi YMA din champha, YMA Day a ni a, Mizoram chhung leh páwna branch hrang hrangah lawm a ni dawn. YMA Day hmangtu zawng zawngte'n hlim leh lâwm takin, hlâwk taka an hman ṭheuh theih nan duhsakna kan hlân e.

Mi ṭhenkhat chuan YMA hlutna a tlahniam tawhah an ngai mai thei a, YMA-a tel a ṭulna hre lo an pung tial tial niin a lang. Mahse, Mizo hnam tana YMA hlutna hi a tlahniam lo a, a zual zel zawk a; kan ram leh hnam dinhmun thlirin, a pawimawh tial tial emaw tih tur a ni.

YMA hi mi chhumchhia leh rethei zawkte ṭanpuitu leh khaichhuaktu a ni a, chhiattawhnaa chhanchhuah leh chhawmdawl hna thawktu pui ber a ni. Ruihhlo a hluar apianga mipuiin an ṭah-awh chu YMA bawk a ni. YMA hmalaknain ram tana rah ṭha a chhuah sawi tur tam tak a awm, YMA hlutna hi sawi nêp theih a ni lo.

YMA hmalaknate hi ram leh hnam tan a hlut em em rualin, duhthusam tâwk lo te, chêt fuh tâwk lohna te a awm ang. Sawiselna aiin duhsakna nena thurâwn inpêk hian awmzia a nei zawk ṭhin. YMA hmalak danah duhkhawp loh kan nei foin a rinawm a; chungah chuan mi dang hriat tura hruaitute dema sawisel mai loin, thurâwn pe ṭhin ila a ṭha.

Mi ṭhenkhat chuan YMA hruaitu nih an châk a ni mai thei a; chutihrualin, hruaitu, a bik takin branch leh group vela hruaitu tam zawk hi chu hruaitu nih châk lêm lo an ni ang. An kohah mawhphurhna mipuiin an nghah avanga hruaitu ni ta an ni furin a rinawm. Tlawmngaih chhuaha YMA hruai hna thawktute thâ tichak zawngin Mizo mipui hian kan ṭawiawm a ṭul.

Mizo mipui hian YMA a tlakhniam kan phal tur a ni lo a, a mualpho loh nan kan vênpui tur a ni a; YMA a chak lehzual theih nan kan theihna zâwn ṭheuhah ṭan ila zel ang u.

Kumina YMA Day hi ram leh hnam tana YMA pawimawhna leh a hnathawh hlu tak takte kan hriat thar lehna ní lo ni se; hruaitute leh member zawng zawng YMA tana kan inpek tharna ní, YMA thupui anga mi dang ṭanpui duhna thinlung kan put tharna ni lo ni rawh se.