Eirûkna dang theitu sorkar hnathawkte

June 12, 2026 khan Serkhan Police Out Post hawnnaah a hawngtu Home Minister chuan, 'No sir' ti ngam officer-te avangin sorkar a kal dik ṭhin thu leh a him ṭhin thu a sawi a, "No sir, ti ngamte hnawk kan tih chuan thuneitute'n inenfiah kan mamawh hle tihna a ni," a ti.

India ram democracy kalphungah sorkar kan tih tak hi Parliament House leh Assembly House vela rorel tura mipuiin an thlan chhuahte hi niin a lang a; sorkar hnathawk kan tihte hi sorkarin a hna thawk tura a rawihte an ni, tiin a sawi theih.

Sorkar kan tih hi India ramah chuan an inthlak ṭhin a, mipuiin sorkar siama rorel turin an duhzáwng an thlang chhuak ṭhin. Mipui thlan tlin MP leh MLA te, sorkara thuneitute chu an inthlak ṭhin a, sorkara hotu lú ber pawh an liam leh ṭhin.

Sorkarin hna thawk tura a rawih sorkar hnathawk kan tihte erawh chu hun rei tak sorkarah an awm a, sorkar thuneitute hrang hrang, party hrang hranga mite an hrawn ṭhin. Sorkar hnathawkte hi sorkar aṭanga chhuak ve zung zung lo an nih avangin sorkar innghahna tak tak an ni a, an pawimawh hle.

Chief Minister, minister-te leh hotu sang dangte hian eirûk duh mah se, sorkar hnathawkte thurualpui lo chuan an eiru thei bik lo, tia sawi a ni fo. Hei hian eirûkna leh hlemhlêtna dang turin sorkar hnathawkte pawimawhzia a tichiang âwm e.

Sorkar hnathawkte hi eirûkna leh hlemhlêtna chungchangah pawh an pawimawh em em a, an duh leh duh lohin kawngro a su thui hle. Chuvangin, sorkar hnathawkte hi chief Minister, minister-te leh hotu lian dangte eiru tur dang theitu an ni.

Officer-te hian eirûkna leh hlemhletna, thil dik lo leh ṭha lo ti tur leh tihpui tura chung lam aṭanga sàwmna leh nawrna na tak an tâwk fo mai thei. Sàwmna leh nawrna an tawn chángin, Home Minister-in a sawi angin, 'No sir' an tih ngam a ṭul.

'No sir' ti ngam tur hian huaisen a ṭul a, dik a ṭul. Sorkar hnathawkte hi thil ṭha lo ti tura nawrna leh thlêmna te 'No sir' tia chháng ngam ni vek se, tih hi mipui duhthusam a ni ngei ang a; ramin hma a sâwn phah hlein a rinawm.