In sak khapna thupek kenkawh a ṭul

Gauhati High Court chuan June 11, 2026 khan Bawngkawn leh Durtlang Leitan inkar kawngpui kama in sak thar phal lohna thupek bawhchhiaa in sa luite thubuai a ngaihtuah.

Bawngkawn - Leitan inkara hmun eng emaw chen chu 'Protected Area' atan puan a ni a, in sak phal a ni lo. AMC-in in sak phal lohna thupek an chhuah tawh a, signboard pawh an târ. Chuti chung chuan in sa lui an awm nual avangin High Court-in thubuai a ziak lut a ni.

High Court hian July 18, 2024-ah thupek chhuahin, Bawngkawn-Leitan inkara in sak phal lohna hmuna in sak thar khapna hmuna in sak mekte leh petrol pump siam tumte chu tihtawp nghal turin a lo ti tawh. Thupek chu mi parukin an zâwm lo nia hriat a nih avangin suo moto case siam a ni.

Bawngkawn-Leitan kawngpui kam vela in sak phal lohna thupek chhuahna a rei tawh fu a, thupek chhuah hnuah thupek palzûta in sak eng emaw zat a awm tho. Chung in sakte chu dang theitu thuneitute'n hmu ve reng mah se, dan an tum lo a, thupek kenkawh an tum chuang lo ṭhin niin a hriat.

In sak phal lohna china in sa luite hian a tirah chuan thing leh mau hmangin, râp in ang lekin tereuhtê an sa phawt a; tichangtlung tial tialin, a hnu zelah cement concrete-in an sa zui ṭhin.

Hetianga in sak phal lohna hmuna in sa hi an la awm reng a, tun hnai lawkah pawh in sak thar a awm. In sak phal loh ni mah se, thupek kengkawhtu turte'n hmu reng chungin thupek kenkawh an tum lo a, an ngaihven lo a, dan an tum lo a; in pangngai tak a ding leh nge nge ṭhin a ni ber.

Bawngkawn-Leitan inkar kawngpui kam, in sak phal lohna hmuna in sak ṭhin a tawp theihna tura High Court-in a bawhzui hi a lawmawm a; theihtawp chhuahin hma la zui zel se, thupek kenkawh a nih ngei theih nan ṭan la zel se a duhawm.

'Protected Area' atana puangtu leh signboard pawh târtu chu AMC a ni. Hun hmasa lama AMC hotute'n an thupek an bawhzui ṭha lo a, an enliam mai mai ṭhin. Khatiang kha a awm tawh loh nan AMC hian in sak khapna thupek a chhuah hi tun aṭang chuan chak takin han bawhzui tawh rawh se.