Mi retheite tan ṭan lak lehzual a ṭul

Synod Prison Ministry (SPM) chuan kum 2025 khan Mizorama jail 11 zinga táng mek awmna jail 10-a tángte dinhmun an zir chiang a; chu an zirchiannaa an hmuh chhuahte chu June 5, 2026 khan zirchianna an buatsaih leh bawk.

SPM-in Mizorama jail hrang hranga tángte dinhmun an zir chiang hi a ṭha hle mai. Hei aia zirchianna mumal zawk leh jail-a tângte mimal leh chhungkua thlenga an dinhmun hriat theihna a la awm lo niin a lang. Zirchianna aṭang hian sorkar, kohhran leh páwl hrang hrangte mai bakah, chhungkua ang pawha ṭan lak lehzualna tur a hriat theih àwm e.

Sualna leh pawikhawihna do tur hian pawikhawihtute dinhmun te, thil sual an tih chhante hriat chian a pawimawh a; mimal nun leh chhungkaw dinhmun thlenga hriat a ṭulna tam tak a awm. SPM-in jail tángte dinhmun an zir chiang hi a lawmawm a, a la ṭangkai hle zelin a rinawm. Hun kal zel turah pawh a khát tâwka tih ṭhin a ṭha viau ang.

Jail-a tángte dinhmun ZPM-in an zirchiannaa an hmuh chhuah pakhat chu, táng zingah sum leh pai harsatna vanga thil sual tih duhna nei 68.4% an awm tih a ni. Hei hi sorkar leh kohhrana mawhphurhna pawimawh neite'n ngun tak an ngaihtuah zui a ṭha âwm e.

Retheihna avanga pawi khawih ta mai mi tam tak an awm tih tángte zirchianna aṭangin a hriat a; hei hian retheihna ûm bo a ṭulzia a tichiang viau. Retheihna ûm bo tur hian mimal an pawimawh viau rualin, sorkarin mawhphurhna tam tak a nei.

Sorkar tih tur pawimawh ber pakhat chu ram leh mipui hmasawnna thlentir a ni a, chutah chuan tih tur tam tak a awm. Retheihna ûm bo tura sorkarin mawhphurhnate hi sorkara thuneitute'n an hriat chian a ngai a; mi retheite khai chhuak a, leirem an rah theih nan sorkar hian nasa lehzualin hma a lak a ṭul tak zet.

Inthlan dawn leh vantlang hmaa thusawia mi retheite hmangaihtu mai ni lo a, a tak taka hmangaiha duhsaktu, hma an sawn theihna tura a taka hma latu nih a ṭul ta hle tih sorkara thuneitute'n an hriat a ngai a; Mizoramah hmasawnna khairual a awm theih nan chak lehzuala hmalak a ngai a ni.