Khawpuia awm inchuh

Health Multipurpose Ser-vice Association (HMSA) in-khawmpuia thusawitu Health minister chuan, Health depart-ment-a thawk, khawpuia insawn duh tam lutuk chu chinfel a nih theihna atan kawng dap a nih thu a sawi a, khawpuia awm duh an tam avanga harsatna an tawh thu a sawi.

Mizorama kan harsatna tawh lian tak pakhat chu sorkar hnathawk duh si, hnathawh duhna nei bik an tam lutuk hi a ni. Sorkar hnathawk hi chuan an hna an zawm hmain khawi hmunah pawh thawk thei an ni tih an inhre sa vek a; nimahsela hna an thawh hnua hmun nuam deuha awm an tum ta vek hian harsatna lian tak a thlen mek a ni.

Mizoram zirna tibuaitu lian tak pakhat chu zirtirtu indaih lo hi a ni a, hetihlai hian khawpuiah chuan zirtirtu an indip lo chauh thung. Zirtirtute hian khawpui hmun nuama thawh an duh avangin naupang an awm mang lohna sikulah pawh zirtirtu tam takte an awm a, zirtirtu mamawh ngawih ngawih thingtlang kilkhawrah indaih lo takin an awm. He thil chingfel thei sorkar hi tun thlengin kan la nei lo hi chu a zialo ngawt mai.

Health department-a hna-thawktute pawimawhna hi a sang hle mai a, khua a kilkhawr poh leh an pawimawhna hi a sang zual niin a lang. Hei vang tak hian khawpuia awm an tum vek chuan an hnathawh chhan mipui tan an ṭangkai nep dawn tihna a ni a, hmun kilkhawr leh harsaah pawh thawk peih tura an rilru an siam a ṭha khawp mai.

Thingtlang kil-khawr zawka hna-thawktute tana sum leh paia hamṭhatna siam hi a finthlak mai thei a, hei hi tih theih a nih chuan thingtlanga awm pawh an hreh lo deuh mai thei. A pawimawh ber erawh chu sorkar chak leh huaisen neih a, mamawhna hmun apianga a hnathawktu dah ngam kan neih hlan hi a nghahhlelhawm tawh hle a ni.