Minister viak ṭha tehna tur

Mizoramah MNF kaihhruai sorkar thar a lo piang ta a, Krismas leh Kumthar chawlh hmang zoin ministry tharin bul an ṭan dawn ta a, minister-te pawhin hna an thawk ṭan tak tak dawn ta. 

Mizoramah hian ‘minister viak ṭha’ han tih mai hi ṭawng­kamah kan hmang fo a, kan tehna hman hi a dik lo palh ang tih a hlauhawm. Mi­nister-te zingah me­dia han hmang thiam deuh te, sorkar official thuchhuaha chanchinbu leh tele­vision lama lang tam bikte an awm ṭhin a, chumi piah lamah chuan social media lam han hmang uar riau bikte pawh an awm ṭhin. 

Media lama lang tam deuh­te hi minister viak ṭha leh hnathawk ṭha, taima bika tehna atana kan hmang a nih chuan kan tisual ang. Tun apangin minister ṭhenkhat an thil tih apiang deuhthaw social media lama thehdarh thiam riau an awm ṭan tawh a, ṭhen­khat chu hna ṭha tak an thawh ngei ngei pawh puanzar nachang hre lo leh thiam lo an awm leh ang. 

Hei vang hian tu minister pawh, chief minister tiamin an hnathawh aṭangin kan teh tur a ni a, tuna an thusawi te, an thil tlawh leh fan kual te, an tih tur an ‘sawi’ ringawt hi chu tehna leh infakna tur a la tling lo. Minister viak ṭha chuan kum nga chhung thuneihna an chan chhungin a department chanah a ṭha zawng­in danglamna a thlen tur a ni a, tun hmaa mite ang mai mai loin hna an thawk tur a ni ang.