Mipui chhiahhlawh

Chief minister Lal Thanhawla chuan, "Sorkar hnathawkte chu sorkar chhiahhlawh leh politician sorkar fawng vuantute chu mipui chhiahhlawh an ni a, kan induhin mipui kan dah hnuai a thiang lo," a ti a; mahni hnathawhna ṭheuha mipui tana dàwr nuam, hna thawk ṭha leh rinawm leh langtlang taka thawh a pawimawh thu a sawi.

Chief Minister thusawi hi thil nihna tak ni mah se, a taka kan awm dan nen chuan a inpersan hle. Mizorama mi biak nuam lo ber hi thlang dawn ta ila, ruling party-a mite zel hi an ni hial mai thei a, anni hi an nih loh chuan sorkar hnathawk
ṭhenkhatte hi an ni thei ang. Heng mite hi ram tana mi pawimawh an nih avang leh, an hnathawhin a zir bawk avangin inchhuang thei dinhmuna an din vang pawh a ni mahna.

Mizorama thil harsa tak chu sorkar hnathawk thunun ngam politician kan nei ta lo hi a ni. Thawk khatlai khan politician huaisen tak leh sorkar hnathawkte hlau lo chu kan nei tawh a, a sorkar hnathawk mai ni lo a mipui lam pawhin intilal leh khawng lutuk angah kan chhuah mai ṭhin. Hei hian Mizorama sorkar hnathawkte lalzia chu a tilang mai awm e.

Tuna kan kalphungah hi chuan sorkar hnathawkte hian an ṭang hma haiin an tana ṭha turin sorkar an nawr zel a, an nawr ber sorkar enkawltu politician lamin anni tihlawm loh hlau siin an lo tawlh ve zel. Politician-te hian rorelna in sang berah an tana ṭha tur bawkin ro an rel fo a, uchuak taka MLA-te induhsak theih dante an siam a; tuna kan rama mi nihlawlh pahnih chu sorkar hnathawk leh politician-te an ni.

Chief minister-in 'chhiahhlawh' tia a sawite thuhnuaiah mipui kan kun a, anni dinhmun a ṭhangin hma an sawn a, mipui nawlpui dinhmun erawh a ṭhang ve meuh lo a, kan ram dinhmun pumpui pawh hi a sang lo hle. Chhiahhlawh dinhmuna ding tura CM-in a sawi politician-te leh sorkar hnathawkte hi chhiahhlawh an ni lo mai a ni lo a, mipui tana ban phak loha an awm chang a tam a; an nihna tak hre chungin insiam ṭha rawh se.