Damdawi-in leh faina a inzawm

Ministry of Health and Family Welfare-in hma a lakna pakhat, India rama sorkar damdawi-inte fainaa an inelna Kayakalp-ah June 24, 2026 khan kum 2025-26 chhunga damdawi-in faia thlante hnena lawmman sem a ni a; damdawi-in eng emaw zatin fai lawmman an dawng.

Kayakalp lawmman hlannaah hian Health Minister chuan, damdawi-in fai leh thianghlim taka inentir chu mipui dikna chanvo a nih thu te, páwn lam faina chauh ni loin, natna darh tur venna lam leh damlote himna a tel avangin ngaih pawimawh a ṭul thu a sawi. Minister thusawi hi a pawimawh tak zet a, damdawi-ina thawkte'n an hriat reng a ṭha.

Damdawi-in leh faina in a inhmeh bik a, fai hi damdawi-in nihna tur pakhat a ni. Mizorama damdawi-in hrang hrang - district hospital, community health centre, primary health centre leh urban primary health centre te bakah, health sub-centre (health and wellness centre) te tunah chuan a fai hlawm ta viau; chutihrualin, la fai tâwk lote pawh a awm àwm e.

Damlohna leh dammawh hritlan chánga mipui inentirna leh inenkawlna hmunte a fai hlawm ta viau hi a lawmawm a; fainaa inelna Kayakalp-in a hrin chhuah a nihna chen pawh a awmin a rinawm. Kayakalp kalpui a ni hi a ṭha em em a, hun lo kal leh zel turah pawh sorkar damdawi-in leh sub-centre ten ngaih pawimawhah nei zui zel se.

Faina leh hriselna hi a inzawm tlat avangin damlote enkawlna hmunte hi fai taka enkawl a ṭul a, hmun dang zawng aiin damdawi-in leh health sub-centre te hi a fai a pawimawh lehzual. Damdawi-inte hi a fai loh chuan hmun dang aiin a rimchhe hma bik.

Hriselna lama inenkawlna hmun hrang hrangte tun aia a fai lehzual theih nan thawktute'n ṭan la lehzual se. Fai turin thawktute'n fai duhna tak tak nen bul an ṭan a ngai ṭhin a; damdawi-inah pawh thawkte'n fai an tum tak tak chuan mipui lam pawhin an zui mai dawn a ni.

Bawlhhlawh thliar danah hmun dang zawng aiin damdawi-inte an fimkhur zual a ngai. Mihring taksa péng te, inzaina leh inenkawlna hmanraw hrang hrangte fimkhur leh uluk taka an thehthang a, dan ang taka sawngbawl a ṭul. Hei vang hian, damdawi-inte hi bawlhhlawh thehthang leh sawngbawl danah fimkhur tak chungin, dan ang takin ti zel rawh se.