Ruihhlo donaa ṭanrual lehzual

June 26 kha khawvel pum huapa ruihhlo dona ni, International Day Against Drug Abuse & Illicit Trafficking a ni. Ruihhlo dona ni pual hian June 25, 2026 khan Mizoram hmun hrang hrangah hun hman a ni. Ruihhlo Dona Ni-ah hian Excise & Narcotics Department chuan Rs 94,83,93,855 (nuai 9,483.93) hû ruihhlo an hâl.

Nasha Mukt Bharat Abhiyaan hnuaiah June 17-26 chhung khan India ram pum huapa ruihhlo do beihpui thlakna, Nasha Mukt Saptah hman a ni bawk.

Ruihhlo donaah hian sorkar, kohhrante leh NGO-te an thawkho ṭha thawkhat viau a, an thawhhona ṭha chuan rah ṭha a chhuah mek zel. Thawhhona hnuaia hmalakna aṭanga ruihhlo sima nun dan pangngaia nung zui ta pawh eng emaw zat an tawha sawi a ni a, a lawmawm.

Ruihhlo laka Mizoram ven him te, ruihhlo bâwiha táng mekte chhan chhuak tura hmalak leh, ruihhlo laka ṭhalaite vente hi sorkar, kohhran, pawl, chhungkua leh mi tin mawh a ni a; phâk tawk ṭheuhah theihtawp chhuah do tlan a ṭul em em.

Khawvelah hian sual a awm reng dawn a, ruihhlo pawh a awm reng ang. Ruihhlo do nasa viau mah ila, Mizoramah hi ruihhlo tawlhrukna kalkawng a nih miau avangin tihrêm vek theih a ni kher lo ang. Ruihhlo laka ṭhalaite vênna lamah nasa lehzuala hma lak a, inzirtirna uar sauh sauh a ngai.

Thil ṭha lo leh sual te hi tih chhin aṭanga inṭan, chìn ṭhan ni zui ta a ni tlangpui a, tih chhin hian sual thûk zawkah mi a hruai lut ṭhin. Ruihhlo phei chu tih chhin a pawi zual. Ruihhlo ti chhin lo tura mahni inven a thiam a ṭul a, ṭhalaite an inven thiam theih nan nasa lehzuala inzirtir a ngai a ni.

Ruihhlo ṭhat lohzia inzirtirna atan chhungkua a pawimawh em em, chhungkaw tinah inzirtir uar a ṭul. Vantlang huap ang chuan zirna-in, kohhran leh NGO-te hi thawh hlâwk tak an ni. Kohhran hrang hrangte'n sunday school leh inkhawm hrang hrangah an sawi tam lehzual a ngai.

YMA-in ruihhlo an do mek hi a lawmawm a, chhungkaw tam takin an thlamuanpui hle. Theihtawp chhuah zel se a, sorkar leh mipui pawhin an thlàwpa an tihchak zel a ṭul. Ruihhlo donaah hian inthlahdah theih a ni lo a, thawhhona ṭha lehzual neia ṭan sauh sauh reng a ṭul a ni.