AMC sum dik taka hman ni rawh se
Financial year 2026-27 chhunga Aizawl Municipal Corporation sum hman tur ruahmanna, budget estimate chu June 29, 2026 khan AMC Board of Corporators ṭhutkhawmah pharha pawm a ni a, cheng nuai 12,754.93 a ni.
AMC budget thar cheng nuai 12,754.93 hi kum liam ta 2025-26 budget estimate cheng nuai 11,217.89 aiin nuai 1,537.04-in a tam zawk. Nuai 12,754.93 zinga 20.91% chauh thawktu hlawh leh inrêlbâwlna atan hman tura ruahman a ni a, hna thawhna (capital expenditure) atan 79.09% lai dah a ni.
Budget pharhtu Executive Corporator chuan, AMC budget chu inthlan dawna an party manifesto mila duan a nih thu te, an manifesto angin hma an lak chhoh dawn thu te, Aizawl mipui tan AMC-in theihtawp an chhuah dawn thute a sawi.
Mizoram state budget-ah kum eng emaw ti chhung chu hmasawnna hna thawhna tur 20% vel chauh a awm ṭhin. Chutihlaiin, AMC budget-ah hna thawhna tur 80% dáwn a awm hi a lawmawm a, Aizawl khawpuiin hma a sawn phah ngei a beiseiawm.
AMC budget-ah hian duhkhawp emaw, duhthusama tam emaw a awm thei kher lo ang; 2026-27 budget ruahman pawh hi ṭhenkhat chuan a tam tâwk lo an ti mai thei. Chutihrualin, AMC inrêlbâwlna leh hmalakna atan chuan a ṭha thawkhatah a ngaih theih.
AMC budget thar hi duhthusama tam a ni lo a nih pawhin, thil tam tak tih theihna leh hmasawnna hna tam tak thawhna tham a ni. Budget chu eng zat pawh ni se, sum awm ang ang dik tak leh daihzai taka hman hi a pawimawh lai a ni a; AMC sum hi eirukna tel loa hman a nih phawt chuan khawpuiin thil hrang hrangah hma a sawn phah ngei ang.
Corporator te, a bikin roreltu party-a corporator-te hian AMC sum hman dan turah rilru thianghlim tak pú se; party mite leh vua leh vâng vulh tum lutukna hian hnathawh a tihkháwbàw ṭhin tih hriain, fimkhur takin inveng rawh se.
Budget pharhtu Executive Corporator-in a sawi angin, AMC hian Aizawl mipui tan theihtawp chhuah se; khawpui faina leh thianghlimna, bawlhhlawh paih leh sawngbawlna lam hi ngaih pawimawh bikah nei se a duhawm. Hmalakna atana pawimawh dangte pawh tam tak a awm ang. AMC-in sum a neihte hi khawpui hmasawnna atan dik takin han hmang phawt mai teh se.