Remna leh muanna vawn nun

Kumina Remna Ni chu kan lo hmang zo leh ta a; Mizote thinlungah a ṭha lamin awmzia nei ngei se a duhawm.

Kum eng emaw ti kal tawh aṭang khan Remna Ni hi inhnialna ní a ni ṭhin a, ṭhenkhat chuan 'Inrem lohna ní' tiin an sawi hial. Politics-ah hamṭhatna leh hmingṭhatna duh luat vanga mi dang sawisel ṭhin vang niin a lang.

Tun hnaiah erawh chuan inhnialna a tlem ta deuhin a hriat a, kumina Remna Ni-ah pawh mi dangte sawipawrna lam hawi a tam lo niin a lang; a lawmawm. Party dangte leh an mite sawichhiatna atana Remna Ni leh a kaihhnawihte hman a ni ṭhin hi a ṭha lo a, Kristianna nen pawh a inhmeh lo.

Mizoram buai kha thil kal tawh a ni a, tuna fak chiam emaw, sawihnàwm chiam emaw hian a tidanglam thei tawh lo. Rambuai khan thil ṭhenkhatah Mizo hnam tan ṭhatna tak a neiin a rinawm a, chutihrualin, ṭhat lohna pawh a nei nual ang.

Social media-ah rualpáwlna atana Remna Ni puala thu leh thlalak dah (post) ringawt hi a tâwk lo; thinlung taka remna leh muanna kan ngaihhlut a, chumi hawia kan ni tin nun leh ṭawngkáah a taka kan lantir zel a ṭul.

Tunah chuan remna leh muanna hnuaiah kan awm tawh a, rilru dik tak nen hmasawn zel tura hma lam kan pan a pawimawh tawh. Rambuaiin a nghawng ṭha lote kha kan hma lam hun atan inzirna leh insiamṭhatna atan hman tum ila, a ṭhatna laite pawh hmasawn zel nan kan hman thiam a ṭha.

India sorkar leh MNF inkarah inremna a awm theihna tura ṭhahnemngai taka thawktute an hlu vek a, an thawh chin leh hmalakna ṭheuh hlutsak thiam a ṭha. Innghirnghona leh buaina ten thla an zàrna ram leh hmunah mipui nun a ralmuang lo a, a hrehawm ṭhin; chuvang chuan remna leh muanna hi kan ngaihlu hle tur a ni.

Mizorama remna leh muanna kan neih hlu tak hi a chhunga chengte hian a chhiat kan phal tur a ni lo a; remna leh muanna kan neih zel theih nan kan phâk tawk ṭheuhah theihtawp kan chhuah ve tur a ni. Remna leh muanna tiderthâwnga tichhe thei zawnga hmalakna leh hma latu apiang chu kan do tlang zel tur a ni.