Zu tihbo vs zu tihto

Excise & Narcotics de­partment minister chuan, MNF party kaihhruai Mizoram sorkarin zu zawrh tihtawp ngei a tum thu a sawi a, "Zu zawrh titawp turin hmalak a ni ang," a ti a; chumi kawngah chuan mipui ṭawiawmna an mamawh thu a sawi. 

Mizoram sorkar hian inthlan hmaa a lo intiam tawh angin zu zawrh phalna hi tihtawp ngei a tum dawn tih a chiang ta a, an intiam anga an kal tur hi a lawmawm hle. Mizoram mipui tam zawk hian dan anga zu zawrh hi an la duh lo niin a ngaih theih a, chu chu vote hmangin an lantir tiin a sawi theih bawk awm e.

Engpawhnise Mizoramah hian zu khap burna dan hi hun rei tak hman a lo ni tawh a, ‘A hlawhtling lo,’ titute ṭan chhan lian tak chu awlsam taka dan loa zu zawrh lei tur a awm reng kha a ni. Zu khap a nihlai khan zu kha tihbo a ni chuang lo a, zu man kha an tito a ni ber zawk. 

Zu hi khap a nih chuan dan loa zu zawrh hi tihbo ngei a ngai a, awlsam taka zu lei tur awm rengte leh ‘zu hmun’ han tih mai tura khua leh veng ṭhenkhat a awmte kha a fel lo hle a ni. Tunah pawh zu zawrh tihtawp la ni lo mah se dry day puan a ni a, dan anga zu lei tur hmu loten dan loa an zawrhna hmun an pan a, man to zawkin zu lei tur chu an hmu reng tho a ni. 

Mizoram sorkar hian zu zawrh phalna hi a titawp a nih chuan zu tibo tak tak turin ṭan a la zui ngei tur a ni a, zu tihbo a tumna lamah zu a tito lek a nih chuan a hlawhchham tihna a ni dawn a, dan anga zu zawrh tihtawpah hian duhtawk mai lo se, dan loa zu zawrh pawh hi an tibo tel vek tur a ni ang.