Footpath-a lirthei dah–dan bawhchhiatna

Aizawl Traffic Police chuan July 1, 2026 khan Aizawla hmun hrang hrangah 'Footpath-ah lirthei din loh tur' tih thuziak 50 vel an tár a, mipui zirtirna atana tih a ni.

Traffic police-te hian kumin April leh June thla inkar, thla thum chhung khan Aizawla kawngpui sira kea kalna (footpath)-a lirthei dah 17 an man a, chu'ng an mante chu pawisa an chawitir ṭhina sawi a ni. Khawpui chhungah kea kalte an him zawk nan khauh taka hmalak zui zel an tum thu an sawi bawk.

Aizawlah hian footpath-a lirthei, a bikin 2wheeler dah (park) hmuh tur a awm fo a, dah ngunna bik hmun pawh a awm nual. Mipui tan a hnawkin a ngeiawm hle ṭhin. Dawrkai ṭhenkhat chuan an dawr zâwn kawngpui kam, vantlang hmun hauhin an taneih tlat fo bawk a; hei pawh hi thil dik lo a ni tlangpui.

Footpath-a lirthei dah ṭhin hi kea kalte tan a hnawk em em a, kea kalte chanvo rahbehna a ni a, mipui zah lohna a ni. Mihring chhia leh ṭha hriatna aṭang pawhin footpath chu kea kalna atana siam a ni a, lirthei dahna tur a ni lo tih a chiang. Footpath-a lirthei dah chut chut hi mi tam takin mawlthlak an ti fo a; dah ṭhinte chuan sim hmak ni se a ṭha hle ang.

Aizawla kea kalna tur bika siama lirthei dah tlat hi tun hma pawhin a lo awm fo tawh a, media-ah pawh tarlan a ni tawh ṭhin. Eng emaw chángin traffic police lamin an bawhzui a, mante pawh an nei ṭhin a ni.

Traffic police-te'n footpath-a lirthei dahte an an bawhzuia an buaipui ṭhat deuh chuan a ziaawm mai a, eng emaw ti chhung chu an dah lo mai zel. Mahse, hun a kal a, traffic police-in an buaipui reng lo a, mi ṭhenkhatin an dah lei mai ṭhin.

Footpath-a lirthei dah ṭhin aṭang leh thil dang aṭang pawhin, lirthei leh a kaihhnawih chungchangah hian mipuite hi vên ngai, khapna thupek nena vau ngai kan ni tih a chiang. Chuvangin, traffic police-te hian footpath-a lirthei dah ṭhin hi ngawrh taka an vila an ûm zui zel a ngai. Hmun hrang hrangah an hmu ve fo ngei ang a, chungte chu enliam mai loin, chawpchilhin hma han la nghal zel teh se.