MUHCS leh a behbâwm

Mizoram State Health Care Society chuan July 2, 2026 khan MJA member-te tan Mizoram Universal Healthcare Scheme chungchang inhrilhfiahna hun an hmang. Chutihlai chuan, damlo enkawlna senso MSHCS-in an bat vanga Aizawla mimal damdawi-in pakhatin damlote a thlâwn (cashless)-a an enkawl theih tawh rih loh thu a darh.

MUHCS inhrilhfiahnaah hian, kum 2025-26 (MUHCS 1.0) aiin kum 2026-27 (MUHCS 2.0)-ah chhungkua 31,421-a an tam zawk thu sawi a ni a; a tam zawkna chhan ber chu inziak lut (general beneficiary) an pun nasat vang a ni. General beneficiary bik hi 1.0-ah aiin 2.0-ah a lêt aia tamin an pung.

MUHCS-a inziak lut nasa taka an pung hi thil ṭha lam a ni a, a lawmawm; Mizoram mipuiin MUHCS-ah beiseina sang tak an nei tih a tilang. Mipuiin beiseina sang tak an neih hi sorkar hian thil ṭha tih hmangin a chhàn lêt a ngai a; beiseina hi beidawnna leh thinrimnaah a chan loh nan theihtawp chhuah a ṭul.

Aizawla MUHCS zawmtu private hospital-in an bill tam tham tak MSHCS-in an bat avangin cashless-a damlo enkawl an theih tawh rih thu thehdarh a ni hi a zialo hle. MJA member-te tana MUHCS zirhonaah MSHCS hotute'n an sawifiah nghal. Damlo enkawlna senso pek tur sumah harsatna a awm loh thu leh, damdawi-in pakhat hnena bill pek a nih mai loh chhan chu - damdawi-in lamin thil dik lo an tih vang a nih thu an sawi.

Private hospital pakhat bill pek mai theih loh chhan an sawi aṭang hian, mi tin hi keimahni zâwn ṭheuhah kan rinawm a ṭulzia leh dik taka thil tih a ngaihzia a lang.

Sorkar thil a nih hian na tak taka sawisel a ni ṭhin a, sorkar hi kan ngam bik a ni mai thei. Sorkar hmalakna leh thil tihah dik lo a awm a nih chuan sawisel tur a ni ngei a; sorkarin dik takin thil a ti tur pawh a ni.

Chutihrualin, sorkar sawisel fotute pawh hi kan inenfiah a ṭul viau. Sorkarah leh sorkar hnathawk zingah hlemhletna leh eirukna a awm fo nia kan hriat rual hian, pawl, private firm leh mimalah pawh corruption a awm thei. Sorkar, pawl leh mi dang zawng zawng hi keimahni zâwn ṭheuhah rinawm leh dik taka thil kan tih a ṭul a ni.