Court thutlukna puanzar
Mizoram sorkara eirukna chhuiut Anti Corruption Bureau Annual Report 2025-26 chu July 2, 2026 khan Chief Minister-in a tlangzarh.
ACB Annual Report-ah hian, kum 2010–2026 inkar, kum 16 chhungin Mizoram ACB-in eirûk thubuai (corruption case) 35-ah court-ah chargesheet an thehluh thu te, chu'ng eirûk thubuaia inhnamhnawih mi 112 chu court-in thiam loh a chantir thute a lang.
Thuneitute'n thil sual tite an man thu media-ah a lang fo. Hei hi mipui náwlpuiin Mizorama sualna leh pawikhawihna a thlen dan leh, pawih khawihtute man an nih leh nih loh an hriat theihna hnár ber a ni a; sual dona atan engtin emaw tak ṭhatna a neih a rinawm.
Chutihlaiin, thuneitute'n pawi khawihtu an mante awm zel dan erawh mipuiin an hre tlem viauin a lang. Pawi khawihtu mante chungthu rèl a nih dan te, hrem an nih leh nih loh te hi media-ah hmuh tur awm ve zauh zauh mah se, a tam ber chu mipui hian an hre zui lo niin a lang.
Tun hnai kum eng emaw ti chhung chu Mizoramah ruihhlo man a tam em em a, tun hnaiah phei chuan ni tin deuh thawh ruihhlo man a awm emaw tih mai tur a ni. Corruption case leh pawi khawihna dang chi hrang hrangah pawi khawihtute man a nih thu pawh hriat tur a tam viau. Mahse, pawi khawihtute zinga a tam berte chungthu rêl a nih dan erawh hriat tur a awm lo thung.
Pawi khawihtu hrem a nih thu hi a theih chin chinah puanzar ni thei se; pawi khawihtute hrem an nih dan te, pawi khawihtu chu a phû tâwka hrem a ni tihte hi mipuiin hria se, sual dona atan ṭangkaina a nei vein a rinawm.
Kawng hrang hranga pawi khawihtute chungthu rèl a nih dan mipui an hriat theihna tur chuan media-te'n an puanzar a ngai a; media-te'n an puanzar theihna tur chuan court lam nen an thawhho ṭhat a ngai ang.
Court lam hian mipui hriat atana ṭha tâwk chin, mipuiin an ngaihven ṭhinte hi chu media-ah pe ṭhin se a ṭhain a rinawm. Hei hi intihlâr tumna a ni lo ang. Media-te nena inlaichina ṭha siam a ṭulna chin a awm ang a; chutiang lam buaipuitu turte indahin, court thutlukna a tam thei ang ber inhriattir thei se a ṭha viau àwm e.