E Roll ennawnah fimkhur a ngai e

Electoral Roll Special Intensive Revision 2026 neih mek a ni a, July 4, 2026 khan Draft Electoral Roll tlangzarh a ni. Draft roll-ah voter 8,28,906 an awm a, Mizoram electoral roll hman meka chuang mi 46,162-te chu chhan hrang hrang vangin paih an ni.

SIR 2026-ah hian BLO-te'n an huam chhung ṭheuhah enumeration form an sem a, form 8,75,068 sem chhuahah form 8,28,906 thehluh (lak let) niin, form 46,162 (5.28%) erawh lak lêt theih a ni lo.

Enumeration form chinfel hun tàwp hma ni thum la awmah chinfel vek a ni a, SIR neih mekna state 16 leh union territory pahnih zingah Mizoram chu zo hmasa ber a nih thu Election hotute'n an sawi.

India rama enumeration form chingfel hmasa ber kan ni hi a lawmawm a, India ramah kan lan mawi phah. Thawktu zawng zawngte inpekna leh thawhrimna vang te, thawktute mipuiin an thawhpui ṭhat vang leh electoral roll ngaih pawimawh vangte a nih a rinawm a; a lawmawm hle.

Electoral roll ennawn rûnpuiah hian India khua leh tui, July 1, 2026-a kum 18 tling chin thun tur a ni a, tunah hian dilna hun hawn mek niin, August 4, 2026 thleng hun hawn a ni.

BLO tinah Draft Roll en theih ani a, online-in en theih a ni bawk. Eng emaw vangin draft roll-ah awm loh palh theih a ni a, chuvangin, draft roll hi ngaihven tlang ila, mahni mai bakah, kan chhungkua kan awm leh awm enfiah nachang hriat a ṭha.

Electoral roll-a inthun dilna hun hawn mek a ni a; hei hi draft roll-a chuang lo, India khua leh tui, kum 18 tling tawhte chuan ngaihven ni se. Draft roll-ah keimah emaw, kan chhungte emaw an awm lo a nih chuan inthun luh dil ran a ṭha; nakin zela buai lohna tur a ni.

Mizoramah India mi ni lo ṭhahnem tak an awm mek a, chu'ngte chuan electoral roll-ah luh tumin hma an la mai thei a, anmahni lo pui duhtu Mizoram mi dik tak zingah an awm thei bawk. Electoral roll ennawn mekah hian India khua leh tui ni lote thun an nih loh nan mi tin kan fimkhur a ṭul. Official-te mai bakah, khawtlang hruaitu VC/LC leh tlawmngai pawl hruaitu te, political party fimkhur chi tinrênga an fimkhur tlan a ngai e.