MHIP Day holiday atana puan hi

July 6 kha MHIP Day vawi 53-na a ni a, Mizo Hmeichhe Insuihkhawm Pawl branch-te'n hlim takin an lawm. MHIP Day hi kum eng emaw zat kal ta aṭang khan Mizoram sorkar chuan chawlhah a puang a ni.

MHIP Day-ah hian branch tam tak chuan inkhawm an buatsaih a, infuih tharna atan te, intihhlimna hun atan te, khawtlang tana thil ṭha tihna atante an hmang. MHIP hmunpui pawhin hmun ṭhenkhatah ṭanpuina thilpek an hlan a ni. Mite chhawmdawl tura Mizo hmeichhiate inpekna a fakawm.

Mizoram sorkar chuan kum eng emaw ti kal ta aṭang khan, tun thlengin MHIP Day hi chawlh (public holiday)-ah a puang a; state sorkar leh a hnuai pêngte zawng zawng tan chawlh a ni a, zirna in zawng zawng khâr a ni ṭhin.

Mizoram sorkar hian sorkar laipui leh state dangte aiin chawlh (public holiday) a nei tam bika sawi a ni fo mai. Chawlh a tam na nâ nâ chuan hnathawh a tlem nge nge a, ram tan, sorkar tan hlohna zel a ni.

Mi tam tak chuan MHIP Day public holiday-a puan hi ṭul lo leh phû loah an ngai a, ngaimawhna pawh a tam tawh. MHIP Day lawmnaah mipa an tel ngai lo tluk a ni a, hmeichhia zingah pawh a tam fê zawk an tel ngai loin a lang.

MHIP Day vanga Day hmang ve ngai miah lote thlenga chawlh ṭhup zel hi a fuh lo deuh a; sorkar leh ram tan hlohna, hna tihkhawtlaina pakhat a ni a, sum záwnga chhût phei chuan a tam tham hle ang.

Holiday atana MHIP Day puan hi chhan hrang hrang avangin state sorkar hian ngaihtuah nawn se, ram leh hnam tana ṭha zawk tur a nih chuan tihtawp mai ngam pawh a ṭha ang. MHIP Day hmang duhte ngaihngam taka an chawlh theih nan restricted holiday ni zawk se, a ṭha zawk ang em? Mizoram mipui ngaihdan thlir tel a ṭha àwm e.

Mizo mipuiin kan hman ve ngai miah loh, sakhaw dang ni pawimawhte pawh holiday-ah puan a ni tho, tih a awm thei. Sakhaw dang ni pawimawhte hi chu Mizote'n kan hman leh hman loh ai mahin, sakhaw zalenna leh intluktlânna ram kan nih angin, sakhaw dangte leh an ni pawimawhte zahna lam thil a ni zawk mahin a lang.