Zirtirtu lâk buaina leh CM thusawi

Mizoram chief minister chuan, tun hnaiah zirtirtu laka sawiselna awm chungchang sawiin, "Zirtirtu lâk vel leh transfer vela buainate hi economics hmasawnnain a chinfel vek theih. Miin kum khata nuai 5-7 an lak luh a, school fee tur an neih chuan public school lo-ah an luhtir thei ang," a ti. 

Tun hnaiah School Education department hnuaia hna lak danah sawi­selna a nasa a, chu­mi chungchang chu chief minister hian thil dang a sawi pah­in a sawi chhuak. CM hian he hna lam buaina hi a hriatpui tih a lang a, chutihlaiin pawisa hmanga chinfel tum anga thu a sawi hi a vanduaithlak takzet a ni. 

He buaina hi economy nena inkaihhnawih lam aiin hna lâk dan kalphung hi a ni zawk mah a, advertisement chhuah loa hna an lak avangin dem a hlawh a ni. Hemi hma lawka zirtirtu 1,000 dawn lâk danah pawh MPSC kutah dah a ni lo a, recruitment rules mumal tak duan a ni lo bawk a, a hmaa zirtirtu hna lâkna tura tehna ṭhenkhatte hman zui a ni ta lo bawk. 

Engpawhnise tun hnaia zirtir-tu lâk chungchanga buaina inṭanna hi chu a hna lak dan kalphung hi a ni ber. Pawisa neih ngah tak avanga chinfel theih chi niin a lang lo a, dik taka kala chinfel chi zawk a ni ang. Mizorama kan chief minister neih­ten thu inchuh pawi­mawh tak awmte an sawi pial mai ṭhin hi a pawi a, Mizo ṭhalaiten dik taka dan anga sorkar hna lâk an duhlaia kan chief minister kam chhuak hian ngaihtuah a tithui ngawt mai.