Zirna kaihhnawiha lungawi lohna

Zirna kaihhnawihah phût neiin Delhi-ah chaw nghei leh lungawi lohna lian tham taka lantir a ni a, hmun dangah kâng kai zelin, India ram state hrang hrang bakah, ram pawn lam thlengin lungawi lohna lantir a ni. Aizawlah pawh July 22, 2026 khan Peaceful Solidarity Protest huaihawt a ni a, July 23-ah MZP-in Peaceful Protest Against NEET Paper Leak' an huaihawt leh bawk.

Nawrh huaihawt chhan bulpui ber chu - NEET-UG 2026 zawhna pût rû vanga Union Education Minister báng tura nawrna niin a lang a; chhan dangte pawh a awm. NEET-UG 2026 exam hi May 3, 2026 khan neih niin, zawhna a pût rû tih May 11-ah finfiah a ni a; June 21 khan exam ṭhat niin, July 16-ah result a chhuak.

NEET-UG-a thil dik lo awm vanga CJP leh Sonam Wangchuk te hmalaknain thâwm a nei lian mai lo a, July 18-a Sonam Wangchuk damdawi-ina dah luh a nih aṭangin boruak a lian tak tak ṭan niin a lang.

Mizoramah phei chuan NEET zawhna a puh rûk aṭanga thla hnih chuang chhungin lungawi lohna thâwm hriat tur a awm lo a; damdawi-ina Wangchuk dah luh a nih hnuah social media chak tawh tak avangin thâwm lian tak a awm ve chauh. Political party-te pawhin thla hnih chuang chhungin thu leh hla an nei lem lo a, boruak a len viau hnuah thuchhuak an nei ta a ni.

Mizorama ṭhalaite punkhawm chhanah 'zirna siamṭhat' tih a tel a; mahse, zirna kalphunga ṭha lo lai leh siamṭhat ngai laite an sawi hriat tur a awm lo. NEP 2020 hman mek a ni a, hman ṭanna a la rei lo; NEP 2020-a siamṭhat ngai lai pawh sawi a awm chuang lo.

Thil hrang hrang thlir hian, Mizo mipui tam ber hi chuan hre chiang lutuk si loin, social media-a thu lêng velin min kaihruai hle niin a hriat. Political party-te pawhin mipui sûkthlêk mek aṭangin party tana hmingṭhatna turin thil an ti mai ṭhin tih a lang bawk.

Engpawhnise, zirna kaihnawiha zirlaite leh ṭhalaite chêt chhuahna leh an au chhuahna hian rah ṭha chhuah se; Mizoram sorkar pawhin zirna lamah nasa lehzuala rilru pein, ṭan lehzual nan hmang se, chu chu ram leh hnamin a hlâwkpuina tur a ni ang.