SSA leh RMSA hna lâk

Zoram Peoples Movement (ZPM) Vigilance department leh ZPM ṭhalai hruaitute chuan, advertisement chhuah loa SSA leh RMSA hnuaia thawk tur zirtirtu 91 lak tawh chu advertisement chhuaha lak ṭhat leh an phût thu leh, a rang thei ang bera recruitment rules (RR) siam an phût thu an puang. 

Tun hnaia Mizo­rama sawi hlawh ber pakhat chu SSA leh RMSA hnuaia hna lak hi a ni. Heng hna lakte hi advertisement chhuah loa lak a ni a, chumiin a lantir chu mipui nawlpui hrilh loa a ruka lak a ni ber mai. He hna lak tur hi an puanzar miau loh avangin a hre chin chiahin an dil dawn tihna a ni a, a tu chin hi nge he hna hi a dil theih tih hria, tih pawh zawhna a awm nghal ang. 

Hna lak dan fel lo rawn hai chhuak hmasatu chu Congress media lam an ni a, anni hian thil awm dan hi RTI Act hmangin an chhui a, mi 91 zet mai chu MNF-in sorkarna vawn fung an chelh hnuah advertisement chhuah miah loin an lo la tawh tih an hria. Congress hian press conference koin he thil fel lo an hai chhuah hi an puangzar ta a ni. 

He thu a chhanna niawm takah School Education minister chuan, ‘An hunlai pawhin an ti ve tho,’ ti ang vela hrilhfiah theih turin a rawn chhang a, “Keini chuan dik takin kan kalpui,’ tih awm loa heti mai maia kan ram hruaitute an tâl 

ṭan mai hi a pawi hle. Chief minister-in rawn sawi zuiin economy lama hmasawnna hmanga chinfel theih niawm takin a rawn sawi pial leh bawk a, a vanduaithlak hle a ni. 

Heng thawktu lak dan hi a dik loin a fel lo a ni tih ram pumin a hre ta a, ‘Congress pawhin an ti ve tho,’ tia inpuhtawna thamraltir an tum nge, ‘MNF kan nia dik takin kan kalpui ang a, RR mumal tak nen hna lak hi kan kalpui ṭha leh ang,’ an ti dawn tih mipuite’n an thlir reng ang.