FCRA Bill - kan ngaihven tlan a ngai

July 25, 2026 tlaia Chief Minister leh kohhran intêl khawmna pawl pahnih - MKHC leh Council of Churches in Mizoram hruaitute inhmukhawm chuan, Foreign Contribution (Regulation) Amendment (FCRA) Bill, 2026 tihdanglam rawtna memorandum sorkar laipuiah thlen an rêl. Bill hi Parliament fûr ṭhutkhawm mekah pawm an tuma sawi a ni.

Chief Minister leh kohhran hruaitute chuan FCRA Amendment Bill hi a nih ang anga pawm theih lohah an ngai a; chuvang chuan Bill tihdanglam rawtna thlen an rêl a ni. An thutlukna hi Mizoram tana ṭha tur niin a hriat a, a lawmawm.

FCRA Bill hi Congress party-in an dodal viau. Press conference an neih phah tawh a, inkhawmah tun hnaia an sawi tam ber a ni a, Black Day an huaihawt phah a, hma la turin Chief Minister an nawr bawk. Party dangte erawh chu an ngawi deuh reng a, tun hnai têah an duh loh thu an hotute'n an sawi chhuak ve ta.

FCRA Bill hi ram dang aṭanga ṭanpuina sum tihtàwpna tur ang hiala sawi a ni a; hei hi duh loh chhan lian ber a ni. Hei hi a dik a nih chuan, Mizorama kohhran leh pawl hrang hrangin nasa takin an tuar dawn a, tunah pawh an tuar mek tawh niin a lang.

Chief Minister-in political party-te sawihopui lo a, hmalak dan tur kohhran hruaitute a sawipui hi a àwm viau. A chhan chu, kohhrante hi FCRA Amendment Bill tuar na ber tura ngaih an ni. Chu bakah, Congress party hi sorkar laipuia rorel mek BJP khingpui ber an nih avangin, party pakhat political advantage laka sorkar leh kohhran vên nan a ṭha bawk.

FCRA Amendment Bill chungchanga CM leh kohhran hruaitute'n an lo rêl tawh hi chak taka bawhzui ni se; Parliament-ah pharh a nih hma ngeiin an duh dante thlen turin hma la se a ṭha hle ang.

Tun hnaiah India ramah leh Mizoramah ngei pawh ṭhalai tam tak an au chhuak a, ram veina vang niin a lang a, a lawmawm. FCRA Bill chungchang pawh hi Mizoram mipui, ṭhalai vengva tak takte hian zir chiangin, Mizoram tana a ṭhatna leh ṭhat lohna turte hriat tum se, ngaihdan mumal tak nei thei se a duhawm.