Huaisen takin thutlukna siam rawh se

Mizoram Govt. Adhoc-Aided High School Teacher’s Association (MIGAHTA) chuan tunlai hian lungawi lohna an lantir mek a; sorkar sikulah la lut (provincialise) turin Mizoram sorkar an nawr a ni.

MIGAHTA hian sorkar kar nan kar hmasa lam khan badge dum an bel bakah, sikul kai chungin zirtir hna an thawk lo (no teaching day) tawh a; July 27 & 28 khan a huhoin chawlh (mass casual leave) an la leh a ni. July 29 & 30 hian Aizawlah sit-in demonstration huai-hawt an tum bawk.

Sorkar lai hun tàwp lamah pawl eng eng emawte'n sorkar an nawr ṭhin a; Mizoramah MLA inthlanpui a hnaih apiangin lungawi lohna lantir leh nawrh thu kan lo hre tawh ṭhin.

Sorkar mek party ṭhenkhatte lahin nuarte thil phût chu inthlan a la hlat laia ti duh si loin, inthlana tlin loh hlauh vang ni ngeia ngaih theihin inthlan dawn hnaiah an tihlawhtling leh nge nge ṭhin a; chung zinga a lâr zual chu - district puan leh dinhmun sang zawka sikul hlan kai (upgrade) a ni.

MLA inthlanpui hnuhnung ber neih hma lawkah pawh khan sorkarin Mizorama sikul tam tak chu dinhmun sang zawkah a hláng kai a; kha pawh kha inthlan thlir chungin, zirtirtute leh an chhungkuate vote hûi duh vang ni ngeiin a hriat. Khatianga inthlan tinzawn ràna thil tih khan a hnu lamah harsatna a thlen ṭhin a ni.

Hringnunah hian mahni inhriat chian a pawimawh hle. Thil eng emawah àwm viaua kan inngaih laiin, mi dangin àwm min ti ve kher lo thei. MIGAHTA pawhin an sikulte provincialise àwm an ti viau a, chutihrualin, Mizoram mipui náwlpui hian àwm an ti ve kher lo thei.

Thil hrang hrangah tehna a ngai ṭhin a, tehfung a awm a ngai. Dinhmun sang zawka sikul hlan kai chungchangah pawh tehfung a awm ngei a ṭul a, tehna mumal awm loa mâwlmang taka dinhmun sang zawka indah ngawt chi a ni lo.

MIGAHTA phût hi sorkar hian ngun takin thlir se, sikul mal mal dinhmun enin, provincialise tlak emaw, tehfung aṭanga ngaihhnahiam theih emaw an lo awm a nih chuan ngaihtuah zui thei se. Sikul dinhmun a inang lo a, adhoc H/S zawng zawng provincialise vek chi erawh a ni hauh lo ang; hei hi MIGAHTA lam pawhin an pawm a ṭul. MIGAHTA phût hi sorkar hian ngun takin ngaihtuah zui se, huaisen takin thutlukna siam rawh se.