Lengpui ram, Court leh CBI

Indian Air Force (IAF)-in Lengpui ram acre 110 vela zau an lakna/leinaa cheng vbc 198.78 an pek chungchangah sawi a tam a, political party-te pawhin inbeih nan an hmang nasa. Thawm a reh deuh hnuah tun hnaiah High Court thupek avangin sawi a tam leh ta.

IAF-in ram an lei chungchangah hian Gauhati High Court-ah PIL thehlut an awm a, a ṭha. Court chuan July 27, 2026 khan a ngaihtuah ṭan a; ram neitu dik tak ni lote hnena pawisa pek a nih chhan leh, eng tianga pe nge an nih tih sawifiah turin Mizoram sorkar a hriattir. IAF-in ram an leinaah hian Rohmingliana hnenah Rs 69,99,60,000 leh Henry Lalremsanga Hlawnmual hnenah Rs 1,17,90,26,34 an pe a ni.

IAF-in ram an lei chungchangah hian sawi a tam hle a, ram leina sum a tam tham êm vang leh ram lei danah dan loa thil tih a awma ngaih vang niin a lang. Politics-a inbeihna pawh a tam phah hle.

IAF-in Lengpui ram an lei chungchang hi High Court-ah petition a luh angin Court-in a ngaihtuah ṭan tawh a, chuvangin, rin thu hmanga politics-a inbeih nan hmang chiam tawh lo ila a ṭha zawkin a rinawm. Thil nihna dik tak hre chiang chuang loa mahni rin dan leh zêldin thubâwl thehdarh vak vak loh a ṭha.

High Court hi ring ngam ila, dik takin ro a rel ang tih ring ila. Dan kalh leh dik lo taka thil ti an lo awm a nih a, finfiah a nih bawk chuan, thil dik lo titu(te) chu danin a la hrem mai dawn a; hrem zingah politician te, ram hruaitute an tel a nih pawhin an tuar mai tur a ni.

IAF-in ram an lei chungchang hi state sorkarin CBI chhui turin phalna a pe a, CBI-ah lehkha pawh a thawn a; hetianga sorkarin hma a la hi a ṭha. Chutihrualin, CBI-in hma an la dan chin erawh hriat chian a ni lo a, an thlen chin pawh hriat a ni lo.

Lengpui ram IAF hnena hralh chungchang CBI-in an chhui hi party tinin an duh a, mipui pawhin an duh tlangpui niin a hriat bawk. Chuvangin, CBI pawhin chhui ngei se, chutiang tur chuan state sorkarin tih theih a neih chinah chak takin bawhzui zel rawh se.