Tipper pawl hmalakna en zui a ṭul

All Mizoram Commercial Tipper Association Owner's and Driver's leh Mizoram Tipper Association hruaitute chuan, state dang aṭanga balu phur lirthei Mizorama lut tur an dang dawn tih July 27, 2026 khan an puang.

Assam-a Bagha balu lak luh chungchangah harsatna an tawh thu an sawi a; Assam aṭanga Mizorama balu rawn lutte dan hmangin an dang dawn a, an hmalaknain awmzia a neih loh chuan tharum nena hmalak an inhuam thu an sawi bawk.

Tipper pawl hruaitute ṭawngkam hman ṭhenkhat hi a mawi lo deuhin a lang a, tharum thawh an hreh lo nia ngaih theih a ni. Press mite hmachhawnnaa ṭawngkamah atan chuan a mawi lo deuhin a hriat. Hei vang hian sorkarin ngun taka a en zui a ṭul.

AMCTA leh MTA hruaitute thil sawite hi sorkarin a ngaihven a, a en zui a ṭul a; a kaihhnawih department leh official-te'n ngun taka en zuiin, uluk takin zir chiang se, ngaihthah loin, a ṭul angin hma la rawh se.

Mamawh chi hrang hrang rawn phur luttute hi Mizoram tan an hlu em em a, an tel lo chuan Mizoram mipui kan awm thei lo a ni ber; mamawh rawn phur luttu zingah hnam dang lirthei a tam zawkin a rinawm. Kan mamawh rawn phur luttu zinga tam tak chu hla tak tak aṭanga rawn kal an ni tih a hriat theih a; an taimak vang te, hnaa an chian vang te, an káwlhràwn vangte a nih a rinawm.

Mizo driver-te erawh a tam ber chu state páwn lamah an kal hla lo tlangpui niin an sawi. Mahni state chhung leh a hnaivai chauha load lak an tum chuan hlâwk tak takna khawp hna thawh turin a daih lo thei a, hei hi hnam dang ngaihtheih loh chhan pakhat a nih a rinawm. Mizo driver-te hian hnam dang driver-teah zir tur tam tak an nei àwm e.

Taimak hi hlawhtlinna bul a ni a, hnam dang nêkchêpna hmanraw ṭha tak a ni bawk. Tipper pawlte thil sawi leh tum hi thil ṭha tak a ni thei a; Mizoramin nasa taka a tawrh theihna a nih erawh chuan a ṭha kher lo thei bawk. Hma an laknaah tharum hmang záwng ni loin, taimakna, inpekna leh rinawmna hmangin an ngaimawh hnam dangte nêk chhuah tum se a ṭha hle ang.