Hmânlai ṭawngkam leh tunlai nun
Chief Minister thusawi duh loh avangin MPYCC hoin August 4, 2026 khan CM thlalak siam danglamin, pawnfèn an fèntir a, khawlai lùn laiah an târ. MPYCC chêt dan hi MHIP-in an duh lo a, August 6 khan press conference an neih phah a, hmeichhe thawmhnaw hmanga indeusawh an duh loh thu an puang; "Hmânlaia ṭawngkam hmante kha vawiinah chuan hman emaw, a taka lan chhuahtir chi a ni tawh lo," an ti.
Mizo nun hluiah an nunphung nena inmil takin ṭawngkam ṭha leh mawi tak tak an nei a, tunlai thlengin sawi a la ni fo. Chutihrualin, nunphung inher danglam zelah, tunlaia hman remchang tawh lo leh a taka tih rem tawh lo a awm nual ang.
Hmânlaia ṭawngkam lâr, 'Pawnfèn féng rawh se' tih hi tunlai thlenga sawi fo a la nih lai hian, hmânlaiah khan a tak taka mipa, pawnfèn fèntir an nei em tih hriat a har. A taka fèntir an awm a nih pawhin, a tlém hlein a rinawm a; a taka hman si loh, intih-elna ṭawngkam ringawt a ni thei.
'Ṭhian chhan thih ngam' tih pawh a lâr a, a mawi em em. Mahse, tunlaiah chuan a taka ṭhian chhan thih ngam nihna lantirna tur a awm tawh meuh lo - nunphung a danglam tawh.
Mizo hmeichhiate hi mipate ai chuan tharum nei lo zawk, chak lo zawk an ni ngei mai a, mahse, huaisen lamah chuan mipate aiin an hniam bik lo mai thei; hmeichhiate kha an dâwih viau anga sawi a ni meuh lo àwm e. Tunlaiah phei chuan mipate aiin hmeichhiate an dâwih zawk anga sawi chi a ni tawh lo a, kawng tam takah mipate aiin hmeichhiate an huai zawk mah a, an káwlhráwng tawh zawk.
Hmânlaia mipa dâwihzepte tih-elna ṭawngkam, 'Pawnfèn féng rawh se' tih hi tunlaiah chuan kan khawsak dan, nun dan leh ngaihdan thar lo chhuak zelte avangin hman a remchâng tawh vak lo; a taka pawnfèn infèntir phei chu a chi tawh lo lehzual. MHIP-te'n hmeichhe thawmhnaw hmanga indeusawh an duh loh thu an sawi pawh hi a àwm em em.
Mizote'n hmânlaia ṭawngkam awmze nei tak tak an hman ṭhinte khan tunlaiah chuan hman a rem vek tawh lo tih kan hriat a ṭha a; chutihrualin, hmanlaia Mizo ṭawngkam ṭha leh mawi, awmze ril tak takte kha vawn nun zel erawh a ṭul thung.