Ram dang mi damlote vil ṭhat a ṭul

Aam Aadmi Party hruaitute chuan August 7, 2026 khan Aizawl Press Club-ah press conference an nei a; ram dang mi (foreigner) damlote Mizoram chhung damdawi-ina enkawl leh kaihhruai dan tur mumal siam turin Mizoram sorkar an phût. Ram dang aṭanga rawn lut damlote enkawl chungchangah kaihhruaina dan a awm lo niin an sawi.

Mizoramah ram dang mi eng emaw zat an awm a, a tam ber chu Myanmar aṭanga rawn lut an ni. Sahimna zawnga rawn lut tam tak an awm rualin, sahimna zawn vanga rawn lut ni lêm lo pawh eng emaw zat an awmin a rinawm.

Mizorama damdawi-in hrang hrangah Myanmar lam mi an tam hle a, a bikin private hospital-ah an tam zuala sawi a ni. Myanmar buaina avangin damdawi-in ṭhenkhat an kal mumal thei tawh lo a, la kal theite pawh an tlabal tawh a; chungte avang chuan Mizorama inenkawl turin an rawn lut nasaa sawi a ni bawk.

Mizoram damdawi-in ṭhenkhata Myanmar lam mi an tam lutuk hi mipui zingah ngaimawhna a lian sâwt hlein a hriat. Ngaimawh a àwm tho rualin, damdawia inenkawl mamawha Mizoram rawn pantute hi damdawi-inte'n an lo hnar a rem lo tih hriat tel a ṭha.

Doctor leh nurse-te hian damlote an enkawl duh lo tur a ni lo a, thih leh dam inkar thilah phei chuan a rang thei ang berin an enkawl tur a ni. An profession-ah hian damlo chu eng hnam leh chi, eng sakhua leh eng ram mi pawh ni se, an hnar thiang lo a, human rights an bawhchhe thiang lo tih kan hriatpui a ngai.

AAP-in an sawi ang hian, ram dang aṭanga Mizoram damdawi-ina enkawl tura rawn lut damlote tan dan leh kaihhruaina ṭha neih a ṭul. Dan awm sa hman theih a awm a nih chuan a nihna ang taka hman a ṭul a, dan leh kaihhruaina a awm lo a nih phei chuan siam ran a ṭha ang. Ram dang mi damlote hi ngaihven loh chuan harsatna leh buaina lian zawk thlentu an la ni thei a, sorkar hian a ngaihthah tur a ni lo.

Damdawi-inte pawh ram dang mite chungchanga an fimkhur a ṭul a; hlâwk duh luat vanga dan loa thil tih a awm tur a ni lo. Mizoram chhung damdawi-ina ram dang mi enkawlte hi an nihna leh dinhmun uluk taka chhinchhiahin, sorkarah hriattir zel ni se a ṭha hle ang.