Fai tura ṭan lâk lehzual a hun

Mizoram Pollution Control Board hnuaia EIACP Hub chuan zin veivâkte’n lirthei aṭanga bawlhhlawh an paih chhuah lohna tura mipui zirtir nan August 7, 2026 khan Anti-Littering Campaign an buatsaih.

Anti-Littering Campaign-ah hian Aizawl aṭanga Lunglei panna kawng, Aizawl daia Ṭawngtaina Hmunah EIACP Hub mi leh sate chuan zin veivâkte hnenah lirthei aṭanga bawlhhlawh paih lo tura ngenna thuziak (pamphlet) an lo sem a; maxicab eng emaw zat hnenah lirthei chhunga dah tur bawlhhlawh báwm tê (car dustbin) an pe bawk.

EIACP Hub hmalakna hi a ṭha hle mai. Tun hma deuh aṭang tawhin leilung leh a chhungte humhalh ṭhat a nih theih nan te, boruak thianghlim a awm theih nan te, faina leh thianghlimna turtein hma an la ṭhin. Hetiang lamah hian mipuite'n hma kan sawn theih nan zirtirna an kalpui ṭhin bawk. An hmalakna rah chhuah hi hmu zung zung lo mah ila, a la lang chhuak zel ang. Hma la chhunzawm zelin, theihtawp chhuah zel se a duhawm.

India ram hi a fai tâwk lo; India ram chhung hmun dangte ngaihtuah chuan Mizoram leh kan khawpuite hi a fai zawk viau. Chutihrualin, ram changkang zawkte nena teh erawh chuan a la fai tâwk lo hle tih a hriat a, chuvang chuan fai turin theihtawp chhuah a ngai.

Khawpuiah leh thingtlangah khaw chhung tihfai hnatlang huaihawt a ni fo a, a ṭha em em. Mahse, hnatlanga khawlai tihfai aṭang ringawt hi chuan faina tluantling a thlen mawh viau; mi tinin faina a taka kan nunpui hi awmze nei zawk leh a pawimawh zawk chu a ni.

Faina lamah hmasawn viau mah ila, kan la fai tâwk lo a ni tih hi inpawm ila, fai turin kan ṭan lehzual a ngai. Khawlai leh kawng sira thil eina káwr, meizial bung leh thil tênau dangte paih mai mai a la tam hle; hengte hi sim a hun tawh tak zet.

Mizoram mipui hian faina hi keimah ṭheuhah bul ṭan ila, bawlhhlawh neih tlem tum ila, kan bawlhhlawh neihte páwn lama paih mai mai lo turin rilru kan siam a hun e.