Transfer hlau lo leh hreh lo nih

Rural Development & Administration Minister chuan August 6, 2026 khan Directorate of Local Administration-in Aizawla Half Yearly Review Meeting an neihnaah, transfer hlau lo leh hreh lo turin thawktute a fuih. Minister sawi hi a pawimawh em em a, sorkar hnathawk zawng zawngte rilru put dan tur a ni àwm e.

Mizoram sorkara department ṭhenkhat chuan thawktu sawn leh awmna hmun siamrem chungchangah harsatna an tâwk ṭhin. Health department leh Education department phei chuan harsatna an tâwk nasa lehzual niin a hriat a, khawpui leh ram laili lamah thawktu an tam laiin, thingtlang lamah an indaih lo hlea sawi a ni ṭhin.

Mizoramah hian hmun kilkhawr lutuk a awm lo sâwt viau a, hmun hlat zawng anga teh phei chuan, India rama state dangte ngaihtuahin hmun hla tak a awm lo. Inkalpawhna kawng a ṭha tial tial a, hei vang hian hmun kilkhâwr lutuk a awm tam tawh lo a ni.

Sorkar hnathawkte hi sawn theih an ni a, sorkarin awm tura a tihna hmuna lungawi taka kal zel mai hi a ṭha ber mai a, an tih tur pawh a ni.

Minister-in a department-a thawkte a fuih ang hian, sorkar hnathawk zawng zawng hian hmun danga sawn chhuah hi hreh lo se a ṭha hle. Khawpui leh hmun lailia awm tura kherh ngar ngar, minister, MLA leh hotu hrang hrangte zar buai char char ṭhin nih loh a ṭha.

Chhungkaw dinhmunin a zir loh avanga mahni khua aṭanga hla taka awm remchang ngang lo erawh awm theih a ni a, harsatna bik neite chu hriatthiampui ve a ngai. Chutihrual vêkin, chhuanlam zawn lutuk erawh a awm ve thei bawk ang.

Transfer hlau lo tura kan infuih rual hian, sorkar hian department tinah transfer & posting kalphung mumal tak a neih a ṭul a; a bik takin thingtlang kilkhâwr ber thlenga dâp chhuaktu Education department leh Health department-ah a ṭul zual.

Mizoram sorkara department tin hian transfer & posting rules ṭha leh mumal tak nei se, rules ang takin kal ngam bawk se; thawktu neih loh leh indaih loh chungchanga harsatna tam tak chu a ziaawm ngei ang.