MPSC chungchanga MZP thil phût

MZP-te'n phût an neih avangin August 10 aṭanga nimin thlengin Mizoram Public Service Commission-a thawkte an dang a, a ni khatnaah police-te nen an innawr deuh nghe nghe. A hmain MPSC pisa kawtah an pungkhawm tawh bawk.

MZP hian MPSC kalphung siamṭhat an duh a, reform committee din turin sorkar an phût. One time registration (OTR) tihtawp bakah, OTR-a document upload kim loh vanga hna diltu hnâwl tawhte offline-a document an thehluhna hun siamsak an phût bawk.

MPSC pawhin MZP thil phût chungchang an sawifiah tawh a; OTR tihtawp a remchan loh thu te, court-a thubuai inchiah mek nen a inkaihhnawih avangin tunah thil tihdanglam ngawt a rem loh thute an tarlang. MZP hmalakna avangin hna lakna tam tak a khawmuan phah thu an sawi tel.

OTR chungchang MPSC-in an sawifiahna a pawmawm viauin a lang. Hna hrang hrang lakna atan OTR-a dik taka inthun lut, document thun ngai kim taka thun thlap mi sing 3 dáwn an awm tawh a, thun lo leh thun kim loh vanga harsatna tâwk chu mi tlem fé zawk an ni.

Mi tlem zawk tana beihna hian mi tam zawk tan harsatna a thlen thei. MZP-in an phût angin mi tlem zawkte tan kawng hawn leh ni ta se, dik tak leh kim taka ti mi tam tak tan a 'fair lo' ve leh thei tho a ni.

Hna thawktu tur laknaah hian inelna hi dilna thehluh aṭangin a inṭan, tih a ni ṭhin a, thil dik lo chu eng hunah pawh hnâwl theih a ni. MPSC-in hna lakna a buaipuiah pawh, dilna famkim lo chu dilna thehluh tirhah emaw, final result chhuah hnu thleng pawhin sût theih a ni ang. Hei hi MZP a ni emaw, ṭhalai, hna zawngte'n hriat chian a ṭha. MZP ṭhahnemngaihna a lawmawm a, chutihrualin, OTR chungchanga an hmalakna hi chu a fuh lo zawk em aw tia ngaihtuah theih a ni.

MZP-in an phût dang, MPSC siamṭhat an duh a, siamṭhat a nih theih nan reform committee din an duhna hi thil àwm tak a nihna lai a awm. A chhan chu, OTR chungchang ni loah, tun hnaiah MPSC tih fel loh eng eng emaw sawi a awm a, result tihdanglam lehte pawh a awm. MPSC pawh an inenfiah a ngai a, ṭan an lak lehzual a ṭul a, sorkarin a tihchak lehzual a ṭul bawk.