Zalennain mawhphurhna a keng tel

Vawiin hi India-in Kumpinu awpna aṭanga zalenna a hmuh champha a ni a; India ram ropui takah zalên tak leh ralmuang taka Independence Day vawi 80-na kan thleng leh thei hi a hlu hle.

Ram zalên nih te, khua leh tuite'n zalên taka an duh anga nun an hman theihna ram nih hi a hlu tak zet a; 'Zalenna aia hlu a awm lo' tih ngam a ni. Zalenna awm lohna leh ram zalên loah chuan mipuite khuahkhirh an ni a; an duh angin nun an hmang thei lo a, an duh zawng apiang an sawi chhuah a rem lo a, mipui nun a chêp ṭhin.

Mizoram pawhin 'rambuai' kan lo tawng tawh a, khatih hun laia Mizo mipui nun chêpziate rualú zawkte chuan an la hre chiang hlein a rinawm a, zalenna hlutzia an hre chiang lehzual ngei ang.

India ramah kan awm a, mipuiin rorel tura an duh zawng an thlan theihna ram a ni. Ram hruaitu tura kan thlante'n dik taka ro an rel loh chuan kan paih thei a, a ṭha tur nia kan hriat mi dang kan thlang thei. Hei ringawt pawh hi a hlu tak zet. Duh záwng sawi theihna zalenna mipuiin kan nei a, roreltu ni mekte pawh mipui vantlang hriatah kan sawisel bawrh bawrh thei ṭhin.

India ramin zalenna a hmuh theihna tura theihtawp lo chhuahtu te, nunna hial hlântute an ropui tak zet a, ngaihsan leh chawimawi an phû em em. Zalenna kan neih theihna tura nasa taka beitute leh nunna hial hlântute kha khua leh tuite hian kan zah tur a ni a, kan phâk tâwkin kan chawimawi ve tur pawh a ni.

"Zalenna tih awmzia chu mawhphurhna a ni," tiin George Bernard Shaw chuan a sawi. Zalenna hian mawhphurhna a keng tel a, khua leh tuite'n zalenna vawng nung turin ti ve tur kan nei a ni. Zalenna hi hman sual theih a ni a, thil dik lo leh ṭha lo te, ram leh hnam tana pawi thei thil tihna remchang atante hman theih a ni a; chutiang chu ni lo tura fimkhur leh invên reng a ngai.

India zalenna champhaah hian ram mipuite'n zalenna hlutzia ngaihtuahin hre thar leh ila; zalenna kan neih hlu tak hi vawng him zel ila, a tichhe thei zawnga hmalakna leh chêtna reng reng chu i do tlat zel ang u.