Civil society hman thiam a pawimawh

Serchhip district-a sorkar thuneitute leh Serchhip District MJA member-te chuan August 12, 2026 khan an district-a national highway thawm ṭhat mek an en a; kawng thawmna atana hmanraw ṭha lo (lung ṭha lo) an lak khawm sate tam tham tak an paihtir.

Serchhip MJA-te tarlan danin, Shivalaya Construction leh KRAM Infracon ten Khumtung leh Keiṭum inkara NH-54 an an thawm ṭhat mek an endik. Shivalaya Construction-in hna an thawhte chu a ṭha thawkhata an hriat laiin, KRAM Infracon hnathawh erawh a muan bakah, a ṭha tâwk loah an ngai. KRAM Infracon-in kawng siamna atana lung an chhel khawl sa truck phur 5 lai chu lung ṭha lo, quarry lung a nih loh avangin an paihtir a ni.

Serchhipa sorkar hotute leh District MJA member-te'n a huhoa kawng siam mek an endik hi a ṭha hle mai a; thawhhona ṭha tak an nei tih a hriat a, a lawmawm. An hmalaknahona avang hian kawng ṭha zawk rang zawka an neih phah ngei a rinawm.

District-a sorkar lam mite leh chanchinbumite'n thawkhoa hmasawnna tur hna thawh mek an enfiah hi hmun danga mite tan entawn tlak a ni a; district tina mite'n entawnin, an district ṭheuha hmasawnna hnathawhte a ṭhat zawk theih nan ṭangho ve thei se a duhawm.

Mizoram hi civil society an tih, pawl chak leh nung ṭha tak tak awmna ram a ni a; heng pawl hrang hrangte hian Mizoram hmasawnna atan leh mipui hamṭhatna turin hmalakna ṭha tak tak an nei ṭhin.

Civil society ṭha leh rintlak tak takte hi sorkar hotute hian an hman thiam a pawimawh a; anmahni tibuaituah ngai mai loin, anmahni puitu atan hman tum se, thawhpui thiam se, ram leh hnam tan a hlâwk hle ang. An hman thiam phawt chuan sorkar hmalakna tichaktu a ni thei a, thil ṭha zawk leh hmasawnna thlentu a ni thei ngei ang.

Khua leh veng hrang hranga khawtlang hruaitute leh pawlte'n an huam chhung ṭheuha hmasawnna hna thawhte an vil ṭhat a ṭul. Hna ṭha tâwk lo leh thil dik lo awm nia an hriat leh hmuh te chu enliam mai loin, sorkar thuneitute hnenah thlenin, a ṭhat zawk theih nan hma lakpui thiam se a ṭha hle ang.