I insûm mawlh teh ang u

Tun hnaia Mualṭhuam North tleirawl thihnain Mizoram a la chiah zel a, Mizo mipui ngaihven ber páwl a la ni reng. Social media-ah thu dik tâwk lo leh rinthu thehdarh a awm zui zel a, Police lamin thu dik tâwk lo thehdarh lo turin mipui an ngen mek zel bawk.

He tualthihna hi a chhuitu ni àwm fahrana lo chhui ve ta chiamte an awm niin a lang; an ṭhahnemngaihna a lawmawm rualin, police-te ring mai se a ṭha zawk ang. Rin thu bâwl phuan chiam te, thil ni thei àwm leh ni thei àwm lote ziak a, sawi a, social media lama lo thehdarh ta vak maite an awm bawk ṭhin.

Media zingah pawh 'content' duh lutuk vang leh mipui ngaihven a nih vanga programme siamna atana hmang zing mah mah pawh an awm a ni mai thei. Media-te mawhphurhna hi - thu dik tak mipui hnena hriattir a ni a, thu dawn leh hriat apiang mipui hriat leh hmuh tura tihchhuah vek tur tihna erawh a ni lo. Chanchin chiang leh lutuka tarlan hi media tih tur a ni vek kher lo a, mipui náwlpui hriat leh hmuh atana pawimawh leh ṭha tâwk a awm.

Mualṭhuam North tleirawl thih dan chhuitu ni àwm ziazánga lo tih ve chiam chiam te, mi lo kawm vak vakte hi mipui rilru tibuaitu leh ngaihtuahna dik lo puttirtu a ni thei a; chintâwk neih a ṭha a, fimkhur a ṭul.

Hnu chhuina atana ṭangkai tur emaw hria chuan a chhuitu police hnenah hriattir zel mai a ṭha ber; police hnena hrilhna tur kan hre mai lo a nih pawhin, khawtlang hruaitute hnenah tal hriattir ni se a ṭha ang. Chuti ni loa rinhlelhawm thil kan hmuh leh hriatte social media-a kan thehdarh nghal zel chuan hnu chhui tiharsatu leh tibuaitu kan ni thei tih hriat a ṭha.

Mipui pawhin kan mit leh beng te tiza lutuk lo thei ila a ṭha a, chintâwk neih tum ila a duhawm. Mi náwlpui hriat atana ṭha tâwk chin chu media pangngai, rintlak zawkte'n an chhuah mai ṭhin. Social media vela thu lêng vel hi rilru hahna siamtu a ni thei a, a ni fo tawh pawhin a rinawm; ngaihdan tâwk neih thiam a ṭul.