Hna chhia leh contractor

Rengtekawn aṭanga Builum panna kawng, Pradhan Mantri Gram Sadak Yajona (PMGSY) sum hmanga siam mekah an lung hman a ṭha tâwk lo tih thu an sawi avangin Kolasib District MJA member-te chuan tun hnai khan a hmunah an enfiah a; lung an hman chu PWD pawm theih chin ni mah se, duhthusam a tling lo tih an finfiah. 

Tun hnaia Mizo­rama thil hluar tak, kan ram ṭhanmawhbawk ang hiala puh theih chu dan anga contract hna hmutu ni loin an thawh ṭhin hi a ni. Ṭawngkam danga sawi dawn chuan contractor ni lo con­tract hna thawk ṭhin, tiin a sawi theih a; contractor-te hming hawha hnathawh tum tiin a sawi theih bawk awm e. 

Kan rama kan kal sualna lian tak chu eizawnna nghet nei mang loa politics kan luhchilh a, chumi hmanga ei hmuh kan tum ṭhin hi a ni. Hei mai hi a ni lo a, mi ṭhenkhat phei chuan politics hi hausakpui tumin an khel a ni ber a, kan ram hmasawnna hna kal tur pawh heng mite kutah hian thui tak chu a lang ral a tih theih ang. 

Hnathawktu thlan dan lan chhuahna chiang tak chu tun hnaia chief minister hnena hna dilna lehkha leak out kha a ni. Kha lehkhaah khan a diltu khan a hna dil a ziak a, contractor hming a hawh kha a ziak lang a, contractor dang pahnih an khaikhin turte lamin a ziak. Chutah chuan kan chief minister berin, "Hei tihsak hram dan lo zawnsak ta che u," tiin PWD Engineer in Chief hnenah lehkha a ziahsak a ni. Hetiang hi hna inpek dan kalphung pangngai ang hialin kan ngai tawh a, hei hi hun rei tak kan rama hna inpek dan kalpui tawh, sorkar thar pawhin a chhunzawm zela chu a ni ta ber. 

Kan hna inpek danin a zir loh avangin kan hnain a tuar a, contractor-te hian an hminga hnathawktute hna chhiaah mawh an phur a ni tih an hriat a, an fimkhur zual a ṭha khawp mai.