KMMTTP leh rêl kawng ngaihven ila

Kaladan Multi Modal Transit Transport Project leh Sairang thlenga rél lut tain a nghawngte leh a nghawng zel turte zir chiangtu Impact Study Committee chuan an zirchianna final draft report August 19, 2026 khan Chief Minister hnenah an thehlut.

Impact Study Committee hi report thehlut turin thla 12 hun pek an ni a, thla 10 chhungin report an peih hman a, an thawkrim tih a hriat a, a lawmawm. Sorkarin zirchiangtu din nachâng a hria hi a ṭha a, Committee-te'n chak taka hma la a, ram páwn thlenga kala an zir chiang leh, ṭha taka report an buatsaih hi a lawmawm hle.

KMMTTP leh Sairang thlenga rél kawng siam hi thil lian tham tak a ni a, Mizorama project lian berte zinga mi ve ve a ni. Mizoram leh Mizote mai ni lo, Mizoram páwn, India ram chhung leh páwn leh, hnam dang tam tak kaihhnawih a nih avangin a pawimawh tak zet a; thil dang tam tak a keng tel a ni.

Rél rawn lut leh KMMTTP hian kan hnam nun, mizia, hawiher leh sûkthlêk te nasa takin a nghawng thei a; hmasawnna tam tak a ken tel karah, kan ram leh hnam nun nasa takin a nghawng ngei ang. Mizo mipuite'n kan phâk tâwk ṭheuhah kan ngaihven a, kan ngaihtuah chian a ngai.

Kan ram leh hnam hi a ṭha lo zawnga a nghawng nat lutuk loh nan te, Zo nun ze mawite leh kan chìn dan ṭhate a tihdal loh nan te, eizawnna leh sumdawnna hrang hrangah Mizote min nêk bettu a nih loh nan te, hnam dangin min chîmralna kawng a nih loh nante tun aṭangin kan invên a ṭul.

Hengah hian sorkarin mawhphurhna a nei lian hle. Impact Study Committee hian ram leh hnam hmangaihna tak tak rilru nen hma la zel se, rawtna an neihte pawh sorkarin chak taka a bawhzui a ngai dawn a ni.

Chutihrualin, sorkar ringawt mawh a ni lo a, pawl, kohhran leh mipui kan pawimawh vek. Mizoram leh Mizo hnam tana nghawng ṭha lo a neih theih zawng zawng laka ṭha taka invêng turin tun aṭangin ngaihtuah tlan a ngai a, invenna turte nasa taka inzirtir a ngai e.