Gorkha-te beisei ngaihtuah uluk ni se
August 18, 2026-a Mizoram Gorkha Youth Association-in Aizawla golden jubilee an lawmnaah Chief Minister chuan, Gorkha-te'n Mizoram tan thil ṭha tam tak an tih tawh thu te, hnam tlawmngai an ni a, Mizote nen innghirnghona an la neih ngai loh thu te, ram buai lai pawhin Gorkha ṭhalai eng emaw zat an rammut ve thute a sawi.
Central YMA President pawhin, Mizorama Gorkha-te chu Mizo khawtlangah an lo lawm thu te, Mizote tan an hnawk lo a, lungrual taka an kal tlàn thu te, Gorkha-te'n OBC an dilna chu NGO Coordination Committee-in an ngaihtuah dawn thute a sawi.
Gorkha-te hi an awmna hmun apiangah ram leh khawtlang tan nasa takin tan an thawk ṭhin niin a lang. CM leh CYMA President ten sawi ang hian, Mizorama Gorkha-te hi Mizote tan an hnawksak lo mai ni loin, Mizo ram leh hnam tan theihtawp an chhuah ṭhin a tih theih. Mitthi lumennaah an kal ve ṭhin a, thlân laih leh khawtlang hnatlangah te pawh an tel ve zel mai. Hengte vang hi a ni ang, Mizo leh Gorkha te inkarah buaina chhuak sawi tur a awm lo viau mai.
Tuna Mizorama Gorkha-te'n an beisei lian tak chu – OBC dinhmuna awm a ni. State sorkar hi OBC dinhmun pe theitu a ni lo a, recommend theitu erawh a ni àwm e; pe theitu chu sorkar laipui a ni.
Mizorama Gorkha-te'n OBC an beisei leh dil hi tun dinhmunah chuan NGOCC-in an duh lo a, an dodal. Chumi vang chu a ni mai thei, state sorkar pawhin tun thlengin a la recommend lo. CYMA President thusawi ngaihtuahin, Gorkha-te hian OBC nih an dilna dodal lo turin NGO-te an ngen thar leh a nih hmel viau.
Mizorama chêng nghet zingah OBC an awm loh avanga sorkar laipui hnuaia Mizoram chhunga hna awmtea OBC reservation hnawhkhah a nih dante pawh ngun taka ngaihtuah tel a ṭul. Mizote nena innghirnghona nei ngai lo, Mizoram tana theihtawp chhuahtute kan dan tlat avang hian, Mizote nena inngeih ngai meuh lote tan kawng kan hawnsak mek reng em, tihte pawh ngaihtuah a ṭha hle.
Gorkha-te hian OBC an niha an beisei ber chu sorkar laipui hnuaia reservation a taka hman theih a ni a, Mizoram sorkar hnuaiah chuan an beisei lo a, nakin zela beisei lo tur pawhin an intiam ngam niin a lang. Heng thil hrang hrangte thlir chung hian Gorkha-te'n OBC nih an dilna chungchang hi NGOCC hian uluk lehzualin ngaihtuah se a duhawm.