Sorkarin home/centre pui hi a àwm

Chief Minister chuan August 22, 2026 khan sorkar sum hmanga Ṭawngṭai Bethel Camping Centre-a mi 80-90 awm theihna tur in sak thar, Jesaia Room a hawng a; "Tun atan chuan TBCC tel lo hian kan khawsa thei lo," a ti.

CM hian TBCC a changtlun sâwt thu te, inthiarna leh kawt zawl ṭha tak leh in tinin choka an neih hran vek tawh thute a sawi bawk. Mizorama ruihhlo ngaite enkawlna lian ber pawl TBCC-in hmunhma thua hmasawnna a neih zinga eng emaw zat chu sorkarin a puihna, sorkar sum aṭanga tih a ni.

Mizoramah ruihhlo ngai an tam avangin a enkawlna hmun a awm ngei a ngai a, enkawlna hmun tel loa kal chi a ni lo. CM-in a sawi angin, tun dinhmunah chuan TBCC pawh an ṭangkai hle. Eng emaw vanga an enkawlte an chhuah huk cháng chuan Aizawla veng tam takin kan buai phah hle ṭhin a ni tih kan hre tawh.

Sorkar sum hmanga TBCC-ah in sak a nih hian mimal, home/centre dintu ṭanpuina a ni ngawt lo a, mi tam tak ṭanpuina a ni a, ruihhlo ngai chhan chhuak tura hmalakna a ni bawk. Sorkarin ruihhlo ngaite a enkawl hleithei lo a, chuvang chuan, pawl leh mimala enkawl ṭha thei zawkte a puih hi a ṭha em em.

Jordan Centre pawh sorkarin a enkawl hleithei lo a, Mizoram Synod enkawl turin a hlan. Sorkar leh Synod inremna angin Jordan Centre enkawlnaah hian sorkarin tih tur eng eng emaw a la nei zui tho a, chuvang chuan sorkarin a tih turte ṭha takin, a hun taka a tih zel a ngai ang. Synod-in a enkawl dan hrim hrim pawh vil zui a ṭul àwm e.

Home/centre chungchangah hian dan hnuaiah thil tih zel a ṭha a, enkawltute'n dan anga an kalpui a ṭul a, sorkara thuneitute pawhin dan an kenkawh ṭhat a ngai. Home/centre-a awm hun chhung chungchangah pawh mumal taka kal theih a ṭha hle ang.

Sorkarin a theih ang anga ruihhlo ngaite enkawlna home/centre a ṭanpui hi a tih àwm tak a ni a, a tlin tâwk zelah uar zawkin pui zel se. Home/centre-te pawh felfai lehzualin inenkawl se, ṭha taka dan zawm a, human right bawhchhe lo zawnga inenkawl turin chak tak, leh fimkhur tak chungin theihtawp chhuah zui zel rawh se.