Damdawi-in tichangtlung zel rawh se

August 19, 2026 khan Zoram Medical College & Hospital-ah hlawhtling takin lung zai–coronary artery bypass graft tih a ni a; Mizorama lung zai hawn (open heart surgery) vawi hnihna nia sawi a ni. Lung zaitu hi Mizo zinga cardiothoracic surgeon awm chhun a ni nghe nghe.

Civil Hospital, Aizawlah pacemaker vuah theih a ni a, Cath-lab pawh awm tawhin, angiography leh angiogram te pawh tih theih a ni tawh. Mizoram sorkar damdawi-inah lung lam natna engpawh enkawl theih a ni ta tihna a ni ber mai. Mimal damdawi-in ṭhenkhatte'n lung lam enkawlna nasa takin an tichangtlung zel bawk.

Mizo zingah lung (heart) lamah harsatna nei, heart attack nei an tam sâwt em em a, zai ngai pawh an tam tial tialin a lang. Lung natna a tam tâk êm avang leh, phai lama inenkawl a hautak avangin state páwna inthawn kher ngai loa Mizorama tih theih a ni ve ta zel hi a lawmawm hle.

Sorkar damdawi-in, lung lam harsatna neite enkawlna leh zai theihna hmunte hi tihchangtlun zel a la ngaiin a rinawm. Sorkar hian thawktu, hmanrua, bungrua leh a ṭul apiangah tichangtlung zel rawh se.

Mizo zingah naupang tê têa lung ṭha lo an tam sâwt hle; mipaah a tam zual. Lung natna hi nunphung natna (lifestyle disease) a nih thu sawi a ni ṭhin a; nun danin a zir loh vanga lung natna tam tak an awm tihna a ni. Mipui, a bikin mipate fimkhur a ngai; ei leh inah insûm a ngai a, zûk leh hmuam leh taksa taka ṭha lo thil dangah te fihlim a pawimawh.

Sorkarin lung natna neite enkawlna a tihchangtlun mek lai hian, natna dang enkawlna lam pawh a tihchangtlun zel a ngai. Hmanrua neih ṭhat loh vanga state pawna inthawn ngai tam tak an awm a; phaiah inenkawlna senso a tam ṭhin.

State páwna inthawn ngai loa kan state chhunga kan inenkawl theih hian sorkar sum tam tak humna a ni thei a; chumi tur chuan hmanrua leh bungrua lamah damdawi-inte tihchangtlun a ngai. Sorkar hian sum sen huam se, natna a tam thei ang ber Mizoramah ṭha taka enkawl a nih theih nan sorkarin theihtawp chhuah zel rawh se.